یونیک کمپنی کے نام پر کروڑوں کا سرمایہ کاری اسکام، اہم ملزم گرفتار
چٹ فنڈز اور بھاری منافع کا لالچ دے کر ہزاروں افراد سے مبینہ دھوکہ دہی
ابتدائی اندازے کے مطابق ملک بھر میں تقریباً 10 ہزار متاثرین
تلنگانہ میں سینکڑوں کروڑ روپے کی دھوکہ دہی کا شبہ، عادل آباد ضلع میں 7 تا 8 کروڑ روپے کے لین دین کا انکشاف
سرمایہ کاروں کی رقم سے مختلف ریاستوں میں ہوٹلس، اراضی اور پلاٹس خریدنے کا الزام
تلنگانہ میں 14 مقدمات درج، ایک اور ملزم مفرور
متاثرین بلا خوف پولیس سے رجوع کریں ۔ ایس پی عادل آباد اکھل مہاجن آئی پی ایس کی پریس کانفرنس
عادل آباد۔ 15 /اکتوبر (خضر احمد یافعی/تلنگانہ وائس) یونیک مرکنٹائل انڈیا لمیٹڈ اور یونیک ایس ایم سی ایس کمپنیوں کے نام پر سرمایہ کاری کی پرکشش اسکیمات، چٹ فنڈز اور بھاری منافع کا لالچ دے کر عوام سے کروڑوں روپے کی مبینہ دھوکہ دہی کے معاملے میں پولیس نے اہم ملزم کو گرفتار کرلیا ہے۔ ابتدائی تحقیقات کے مطابق اس معاملے میں تلنگانہ بھر میں سینکڑوں کروڑ روپے کی دھوکہ دہی کا شبہ ہے، جبکہ ملک بھر میں تقریباً 10 ہزار افراد متاثر ہونے کا اندازہ لگایا گیا ہے۔
یہ تفصیلات ضلع ایس پی اکھل مہاجن آئی پی ایس نے بدھ کے روز عادل آباد کے آرمڈ ریزرو (اے آر) ہیڈکوارٹرس میں منعقدہ پریس کانفرنس میں صحافیوں کو بتائی۔ایس پی کے مطابق ابتدائی تحقیقات میں یہ بات سامنے آئی ہے کہ ملزمین نے مختلف ایجنٹس کے ذریعہ عوام کو راغب کرتے ہوئے یونیک کمپنیوں کے نام پر کئی سرمایہ کاری اسکیمات متعارف کروائیں۔ سالانہ ادائیگی اسکیمات، ماہانہ اقساط، فکسڈ ڈپازٹس اور دیگر منصوبوں کے ذریعہ لوگوں سے رقم وصول کی گئی۔ سرمایہ کاروں کو یقین دلایا گیا کہ مقررہ مدت مکمل ہونے پر ان کی اصل رقم کے ساتھ اضافی منافع بھی ادا کیا جائے گا۔
اس کے علاوہ ضرورت پڑنے پر اہم مقامات پر پلاٹس فراہم کرنے کا وعدہ بھی کیا گیا۔ تاہم، مقررہ مدت پوری ہونے کے باوجود سرمایہ کاروں کو مبینہ طور پر رقم واپس نہیں کی گئی اور ادائیگیوں کو مسلسل ٹالا جاتا رہا۔ اس کے نتیجے میں کئی متاثرین نے پولیس سے رجوع کیا، جس پر مختلف پولیس اسٹیشنوں میں مقدمات درج کیے گئے۔ عادل آباد ون ٹاؤن، ٹو ٹاؤن، موالا، عادل آباد رورل اور تلامڈگو پولیس اسٹیشنوں میں اس کمپنی سے متعلق مقدمات درج ہیں۔
ریاست تلنگانہ میں اس معاملے سے متعلق اب تک 14 مقدمات درج ہونے کی اطلاع ہے۔ میدک، نظام آباد، کریم نگر اور سرسلہ اضلاع میں بھی مقدمات درج کیے جانے کی اطلاعات ہیں۔ پولیس متعلقہ ریکارڈ کی جانچ کرتے ہوئے دھوکہ دہی کی مجموعی مالیت اور متاثرین کی تعداد کا پتہ لگانے میں مصروف ہے۔
تحقیقات کے دوران یہ شبہ ظاہر کیا گیا ہے کہ عوام سے وصول کی گئی رقم کے ذریعہ مختلف مقامات پر ہوٹلس، اراضی اور پلاٹس خریدے گئے۔ ملزم کی جانب سے بنگلورو، مغربی بنگال، جئے پور، مہاراشٹرا اور دیگر مقامات پر ہوٹلس خریدے جانے کی اطلاعات سامنے آئی ہیں۔ حیدرآباد اور اس کے اطراف میں بھی جائیدادیں حاصل کرنے کے معاملات کی جانچ کی جارہی ہے۔
Advertising
ایس پی کے مطابق تحقیقات میں حیدرآباد کے میاپور علاقے میں تقریباً 400 پلاٹس خریدے جانے اور شہر کے مضافاتی علاقوں میں اراضی حاصل کیے جانے کی اطلاعات ملی ہیں۔ اسی طرح بی بی نگر میں آل انڈیا انسٹی ٹیوٹ آف میڈیکل سائنسز (ایمس) کے قریب تقریباً 200 ایکڑ اراضی خریدے جانے کے معاملے کی بھی جانچ کی جارہی ہے۔ پولیس ان جائیدادوں کی خریداری میں استعمال ہونے والی رقم کے ذرائع، مالی لین دین اور اس معاملے میں دیگر افراد کے ممکنہ کردار کا پتہ لگارہی ہے۔ملزم سے پوچھ تاچھ کے دوران سامنے آنے والی معلومات کے مطابق عادل آباد برانچ میں تقریباً 2 ہزار ارکان سے متعلق لین دین کی مالیت 7 کروڑ تا 8 کروڑ روپے بتائی گئی ہے۔ تاہم، ضلع میں متاثرین کی حقیقی تعداد اور سرمایہ کاروں کو ہوئے مجموعی نقصان کی پولیس مزید جانچ کررہی ہے۔تلامڈگو پولیس اسٹیشن میں درج ایک مقدمے کے سلسلے میں موصولہ مصدقہ اطلاعات کی بنیاد پر پولیس نے 13 اکتوبر کی شب عادل آباد کلیکٹریٹ چوک کے قریب کارروائی کرتے ہوئے اہم ملزم راج کمار رائے کو حراست میں لیا۔
بعد ازاں اسے تلامڈگو پولیس اسٹیشن منتقل کرکے قانونی کارروائی کے بعد باضابطہ طور پر گرفتار کرلیا گیا۔ اے ون: راج کمار رائے عرف راج کمار کیلاش رائے (عمر 69 سال)،یونیک مرکنٹائل انڈیا لمیٹڈ کا منیجنگ ڈائریکٹر/کل وقتی ڈائریکٹر۔ پتہ: 9، پارک ایونیو، گلاب ٹاور کے بالمقابل، تھلتیج، احمد آباد، گجرات۔، اے ٹو: چندر شیکھر،یونیک ایس ایم سی ایس، حیدرآباد کا زونل منیجر۔(مفرور)پولیس کو یہ اطلاعات بھی موصول ہوئی ہیں کہ ملزم نے ماضی میں میڈیکل کمپنی قائم کرنے، ہوٹلس میں ملازمتیں فراہم کرنے اور بیرون ملک ملازمت دلانے کے نام پر بھی مبینہ طور پر دھوکہ دہی کی تھی۔
پولیس ان الزامات سے متعلق شکایات، مقدمات کے ریکارڈ اور دیگر شواہد کا جائزہ لے رہی ہے تاکہ یہ معلوم کیا جاسکے کہ آیا ان معاملات کا موجودہ کیس سے کوئی تعلق ہے یا نہیں۔
ضلع ایس پی اکھل مہاجن آئی پی ایس نے یونیک کمپنیوں میں سرمایہ کاری کرکے رقم گنوانے والے تمام متاثرین سے اپیل کی کہ وہ بلا خوف اپنے متعلقہ پولیس اسٹیشنوں سے رجوع کریں۔ انہوں نے متاثرین کو مشورہ دیا کہ وہ اپنی سرمایہ کاری کی رسیدیں، بینک لین دین کے بیانات، معاہدے اور دیگر دستیاب دستاویزات پولیس کے حوالے کریں تاکہ تحقیقات میں مدد مل سکے۔ایس پی نے عوام کو خبردار کیا کہ پرکشش اسکیمات اور غیر معمولی منافع کے وعدوں سے متاثر ہوکر کمپنی کی ساکھ اور قانونی حیثیت کی مکمل جانچ کیے بغیر رقم سرمایہ کاری نہ کریں۔انہوں نے بتایا کہ پولیس مزید متاثرین کی تفصیلات جمع کررہی ہے اور اس معاملے میں ملوث دیگر افراد کے کردار کی بھی تحقیقات جاری ہیں۔ تحقیقات میں سامنے آنے والے حقائق کی بنیاد پر مناسب قانونی کارروائی کی جائے گی۔
اس پریس کانفرنس میں عادل آباد ڈی ایس پی ایل۔ جیون ریڈی، رورل سی آئی رحیم پاشا، تلامڈگو ایس آئی ڈی۔ رادھیکا اور دیگر پولیس عہدیدار موجود تھے۔
