عادل آباد میں نابالغ ڈرائیونگ کے خلاف پولیس کی خصوصی مہم، 376 گاڑیاں ضبط
دسہرہ تعطیلات کے دوران کارروائی، نابالغ ڈرائیوروں اور ان کے والدین کی کونسلنگ؛ آئندہ خلاف ورزی پر والدین کے خلاف مقدمات درج کرنے کا انتباہ ۔ ضلع ایس پی
عادل آباد۔22/اکتوبر(تلنگانہ وائس)
عادل آباد ضلع میں سڑک حادثات کی روک تھام اور نابالغ بچوں کو گاڑیاں چلانے سے باز رکھنے کے لیے پولیس کی جانب سے خصوصی مہم چلائی گئی۔ دسہرہ کی تعطیلات کے دوران ایک ہفتے تک جاری رہنے والی اس مہم میں ضلع بھر سے نابالغوں کے زیر استعمال 376 گاڑیوں کو ضبط کیا گیا۔ ضلع ایس پی اکھل مہاجن آئی پی ایس نے واضح کیا کہ نابالغوں کا گاڑیاں چلانا قانوناً جرم ہے اور آئندہ اس معاملے میں خلاف ورزی کرنے والوں کے خلاف سخت قانونی کارروائی کی جائے گی۔
منگل کے روز پولیس اے آر ہیڈکوارٹرس میں نابالغ ڈرائیوروں اور ان کے والدین کے لیے کونسلنگ پروگرام منعقد کیا گیا۔ اس پروگرام میں ضلع ایس پی اکھل مہاجن نے شرکت کرتے ہوئے نوجوانوں، نابالغوں اور ان کے سرپرستوں کو سڑک تحفظ کے بارے میں شعور بیدار کیا۔
Advertising
اس موقع پر ایس پی نے کہا کہ بار بار آگاہی فراہم کرنے کے باوجود اگر کوئی نابالغ گاڑی چلاتے ہوئے پکڑا جاتا ہے تو آئندہ اس کے خلاف قانونی کارروائی کی جائے گی۔ انہوں نے خبردار کیا کہ نابالغوں کو گاڑیاں چلانے کی اجازت دینے والے والدین اور گاڑیوں کے مالکان بھی قانونی کارروائی کی زد میں آسکتے ہیں۔
انہوں نے بتایا کہ نابالغ ڈرائیونگ کے باعث نہ صرف خود بچوں کی جان خطرے میں پڑتی ہے بلکہ دوسرے افراد بھی سڑک حادثات کا شکار ہوسکتے ہیں۔ اگر نابالغ کی جانب سے گاڑی چلاتے ہوئے حادثہ پیش آتا ہے تو انشورنس کے فوائد حاصل کرنے میں بھی مشکلات پیدا ہوسکتی ہیں۔ اسی لیے والدین کو چاہیے کہ وہ اپنے بچوں کو 18 سال کی عمر مکمل ہونے اور ڈرائیونگ لائسنس حاصل کرنے کے بعد ہی گاڑی چلانے کی اجازت دیں۔
ایس پی کے مطابق دسہرہ کی تعطیلات کے موقع پر ضلع بھر میں ایک ہفتے تک چلائی گئی خصوصی مہم کے دوران عادل آباد سب ڈویژن میں 245 اور اوٹنور سب ڈویژن میں 131 گاڑیاں ضبط کی گئیں۔ ضبط شدہ گاڑیوں کو متعلقہ جرمانوں کی ادائیگی کے بعد والدین کے حوالے کیا جائے گا۔
انہوں نے والدین کو مشورہ دیا کہ وہ اپنے بچوں کی سرگرمیوں پر نظر رکھیں اور انہیں رات کے اوقات میں غیر ضروری طور پر سڑکوں پر گھومنے سے روکیں۔ انہوں نے کہا کہ نابالغوں کو گاڑیاں چلانے کی اجازت دینا ان کی اپنی زندگی کے ساتھ دوسروں کی جانوں کو بھی خطرے میں ڈالنے کے مترادف ہے۔ والدین کو چاہیے کہ وہ اپنے بچوں کو کسی بھی صورت میں ڈرائیونگ کی ترغیب نہ دیں۔
ضلع ایس پی نے گاڑی چلانے والوں سے اپیل کی کہ وہ لازمی طور پر ہیلمٹ پہنیں، ٹریفک قوانین پر عمل کریں اور نشے کی حالت میں گاڑی چلانے سے گریز کریں۔
انہوں نے مزید بتایا کہ پولیس اور عوام کی مشترکہ کوششوں کے نتیجے میں رواں سال اب تک گزشتہ سال کے مقابلے میں سڑک حادثات میں ہونے والی اموات میں 26 فیصد کمی درج کی گئی ہے۔
اس پروگرام میں عادل آباد ڈی ایس پی ایل۔ جیون ریڈی، اے آر ڈی ایس پی کمتَم اندروردھن، ٹاؤن سی آئی بی۔ سنیل کمار، کے۔ ناگراجو، وینکٹیشورلو، رحیم پاشاہ، ٹریفک ایس آئی دیویندر، منیش اور دیگر پولیس اہلکار موجود تھے۔
