اسپوکِن انگلش سے طلبہ میں خود اعتمادی پیدا کرنے پر زور
طلبہ کی انگریزی زبان کی صلاحیتوں کو فروغ دیا جائے ۔ کلکٹر راجَرشی شاہ
عادل آباد، 27 /اکتوبر (اسٹاف رپورٹر/تلنگانہ وائس) ضلع کلکٹر راجَرشی شاہ نے کہا کہ اساتذہ طلبہ میں انگریزی زبان پر عبور پیدا کرنے کے ساتھ ان میں پوشیدہ صلاحیتوں کو اجاگر کرنے اور خود اعتمادی بڑھانے کے لیے مؤثر اقدامات کریں۔
صحت مند اسکول پروگرام کے تحت ستمبر ماہ کے لیے ’اسپوکِن انگلش ریویو میٹنگ کم مقابلوں‘ کا انعقاد منگل کے روز کلکٹریٹ کے میٹنگ ہال میں عمل میں آیا۔ اس پروگرام میں ضلع کلکٹر راجَرشی شاہ نے مہمانِ خصوصی کی حیثیت سے شرکت کرتے ہوئے طلبہ سے بات چیت کی۔
Advertising
کلکٹر نے کہا کہ موجودہ مسابقتی دور میں انگریزی زبان میں گفتگو کرنے کی صلاحیت انتہائی اہمیت رکھتی ہے۔ طلبہ کو ابتدائی عمر ہی سے انگریزی میں پُراعتماد اور واضح انداز میں بات کرنے کی ترغیب دی جانی چاہیے۔ انہوں نے مشورہ دیا کہ اسکولوں میں اسپوکِن انگلش کی تعلیم کو مؤثر انداز میں نافذ کرتے ہوئے طلبہ کے دلوں سے انگریزی زبان کا خوف دور کیا جائے اور ان میں خود اعتمادی پیدا کی جائے۔
اس موقع پر طلبہ کی انگریزی زبان کی صلاحیتوں اور اب تک ہونے والی پیش رفت کا جائزہ لیا گیا۔ بعد ازاں مختلف موضوعات پر اسپوکِن انگلش کے مقابلے منعقد کیے گئے، جن میں طلبہ نے جوش و خروش کے ساتھ حصہ لیا۔ بہترین کارکردگی کا مظاہرہ کرنے والے طلبہ کی کلکٹر نے ستائش کی اور انہیں مستقبل میں مزید بہتر مظاہرہ کرنے کی ترغیب دی۔ مقابلوں کے فاتحین میں سرٹیفکیٹس بھی تقسیم کیے گئے۔
اس پروگرام میں صحت مند اسکول پروگرام کے ضلعی کوآرڈینیٹر اجئے، اسکول اسسٹنٹس رگھوناتھ اور بالاجی، اساتذہ، طلبہ، والدین اور دیگر افراد موجود تھے۔
