ماں کی ڈانٹ سے ناراض ہوکر گھر سے نکلا 11 سالہ بچہ تین گھنٹوں میں بحفاظت بازیاب
سی سی ٹی وی کیمروں کی مدد سے موالا پولیس کی تلاش، خصوصی ٹیموں نے بچے کو والدین کے حوالے کیا
بچوں کی معصومیت کو سمجھیں، محبت اور شفقت سے تربیت کریں
عادل آباد۔3/نومبر(تلنگانہ وائس)
بچے پھولوں کی مانند ہوتے ہیں، ان کے ننھے دل بہت حساس ہوتے ہیں۔ والدین کی معمولی سی ڈانٹ بھی کبھی ان کے دل پر گہرا اثر ڈال سکتی ہے۔ اسلام بھی بچوں کے ساتھ محبت، نرمی اور شفقت سے پیش آنے کی تعلیم دیتا ہے۔ رسول اللہ ﷺ نے بچوں پر رحم و شفقت کرنے کی تلقین فرمائی ہے۔ ایسے میں والدین کی ذمہ داری ہے کہ بچوں کی غلطیوں پر غصے کے بجائے پیار اور حکمت سے ان کی اصلاح کریں۔
Advertising
عادل آباد شہر میں ایک ایسا ہی واقعہ پیش آیا، جہاں ماں کی ڈانٹ سے ناراض ہوکر گھر سے نکل جانے والے 11 سالہ بچے کو موالا پولیس نے اپنی فوری کارروائی اور بہترین حکمت عملی کے ذریعے صرف تین گھنٹوں میں تلاش کرکے بحفاظت والدین کے حوالے کردیا۔
تفصیلات کے مطابق عادل آباد کے علاقے شاد نگر سے تعلق رکھنے والی سمرین بیگم کے پانچ بچے ہیں، جن میں چار بیٹیاں اور ایک بیٹا شامل ہے۔ 11 سالہ بیٹا چوتھی جماعت میں زیر تعلیم اور بہن بھائیوں میں سب سے بڑا ہے۔
Advertising
2 نومبر کی صبح والدہ کسی کام سے گھر سے باہر گئی ہوئی تھیں۔ اسی دوران بڑی بہن کے ساتھ جھگڑے پر والدہ نے بیٹے کو ڈانٹ دیا، جس سے دل برداشتہ ہوکر وہ صبح تقریباً 7 بجے کسی کو بتائے بغیر گھر سے نکل گیا۔
Advertising
بچے کے لاپتہ ہونے پر والدہ نے شاد نگر میں منعقدہ پولیس کے ’’می کوسم‘‘ پروگرام کے دوران موالا پولیس سے شکایت کی۔ شکایت ملتے ہی موالا سرکل انسپکٹر بی ڈی پریم کمار نے تین خصوصی ٹیمیں تشکیل دے کر بچے کی تلاش شروع کردی۔
پولیس ٹیموں نے شہر کے مختلف مقامات پر نصب سی سی ٹی وی کیمروں کی فوٹیج کا باریک بینی سے جائزہ لیا اور وسیع پیمانے پر تلاش جاری رکھی۔ پولیس کی فوری کارروائی اور باہمی تال میل کے نتیجے میں شکایت موصول ہونے کے صرف تین گھنٹوں میں بچے کا سراغ لگا لیا گیا اور اسے بحفاظت والدین کے حوالے کردیا گیا۔
ضلع ایس پی اکھل مہاجن آئی پی ایس نے موالا پولیس کی فوری کارروائی اور پیشہ ورانہ مہارت کی ستائش کی۔
والدین کے نام ایک پیغام: بچوں کی تربیت صرف ڈانٹ ڈپٹ سے نہیں بلکہ محبت، اعتماد اور اچھے اخلاق سے ہوتی ہے۔ قرآن و سنت ہمیں نرمی اور رحمت کا درس دیتے ہیں۔ بچوں کی چھوٹی چھوٹی غلطیوں کو سمجھتے ہوئے ان کی رہنمائی کریں، کیونکہ والدین کی شفقت ہی بچوں کے لیے سب سے بڑا سہارا ہے۔
ساتھ ہی پولیس نے والدین کو مشورہ دیا کہ اگر کوئی بچہ گھر سے لاپتہ ہوجائے تو انتظار کرنے کے بجائے فوری طور پر قریبی پولیس اسٹیشن سے رجوع کریں۔
Advertising
