ریکوری کی گئی موٹر سائیکل کمپنی کے حوالے کرنے کے بجائے رہن رکھ کر رقم ہڑپ، دو گرفتار
عادل آباد، 19 /ستمبر(تلنگانہ وائس)ریکوری ایجنسی میں ایجنٹ کے طور پر کام کرتے ہوئے ریکوری کی گئی موٹر سائیکل کمپنی کے حوالے کرنے کے بجائے رہن رکھ کر رقم حاصل کرنے کے الزام میں ون ٹاؤن پولیس نے دو افراد کو گرفتار کیا ہے۔
ون ٹاؤن انسپکٹر بی سنیل کمار کے مطابق گرفتار شدگان کی شناخت شیخ عبید اللہ عرف شاروق (33) ولد شیخ سردار، ساکن بنگاری گوڑہ، عادل آباد رورل، اور شیخ عبدالنعیم (29) ولد شیخ عبدالحفیظ، ساکن خانہ پور، عادل آباد کے طور پر ہوئی ہے۔
Advertising
پولیس کے مطابق دونوں ملزمان دھرویکا انٹرپرائزز ریکوری ایجنسی میں ریکوری ایجنٹس کے طور پر کام کرتے تھے۔ تقریباً ایک ماہ قبل انہوں نے عبداللہ چوک کے رہنے والے گائیکواڑ سبھاش سے ریکوری کی جانے والی بجاج پلسر موٹر سائیکل حاصل کی تھی۔ تاہم موٹر سائیکل کمپنی کے حوالے کرنے کے بجائے اسے کچھ عرصہ خانہ پور میں رکھا گیا۔
Advertising
بعد ازاں رقم کی ضرورت کے باعث دونوں نے خانہ پور کے رہنے والے محمد توفیق کے پاس موٹر سائیکل کو رہن رکھ کر 30 ہزار روپے حاصل کیے۔ پولیس کے مطابق ملزمان نے دورانِ تفتیش اعتراف کیا کہ رقم دونوں نے آپس میں برابر تقسیم کی اور اسے ذاتی ضروریات اور دیگر اخراجات پر خرچ کیا۔
Advertising
پولیس نے ملزمان کے قبضے سے دھرویکا انٹرپرائزز کے ملازمتی شناختی کارڈ بھی ضبط کرلیے ہیں۔ پولیس کے مطابق ملزمان کی نشاندہی پر موٹر سائیکل رہن رکھنے والے شخص کے مکان تک پہنچنے کی کارروائی کی جارہی ہے۔
کیس کی مزید تفتیش جاری ہے۔ اس کارروائی میں ون ٹاؤن ایس آئی ناگ ناتھ بھی موجود تھے۔
