عادل آباد میں بتکما تہوار کا شاندار آغاز، سماج میں خواتین کا اہم کردار ۔ ضلع کلکٹر راجَرشی شاہ
عادل آباد میں مختلف محکمہ جات کے مشترکہ اہتمام میں تقریبات، کلکٹر راجَرشی شاہ اور مارکیٹ کمیٹی چیئرمین سری کانت ریڈی نے پوجا کے بعد کیا افتتاح، خواتین نے بتکما گیتوں پر روایتی رقص پیش کیا
عادل آباد، 13 اکتوبر 2026(تلنگانہ وائس) تلنگانہ کی تہذیب و ثقافت کی علامت بتکما تہوار کا عادل آباد ضلع مرکز میں شاندار آغاز عمل میں آیا۔ مقامی اندرا گورنمنٹ جونیئر کالج گرلز اسکول میں ایس سی، بی سی، اسکولی تعلیم اور انٹرمیڈیٹ محکمہ جات کے مشترکہ زیرِ اہتمام یہ تقریبات جوش و خروش کے ساتھ منعقد کی گئیں۔
اس موقع پر ضلع کلکٹر راجَرشی شاہ اور عادل آباد مارکیٹ کمیٹی کے چیئرمین سری کانت ریڈی نے مہمانانِ خصوصی کی حیثیت سے شرکت کی۔ انہوں نے پوجا کے بعد بتکما تقریبات کا باضابطہ افتتاح کیا۔
اس موقع پر کلکٹر راجَرشی شاہ نے ضلع کے عوام کو بتکما اور نوراتری تہواروں کی مبارکباد پیش کی۔ انہوں نے کہا کہ پھولوں کو دیوتا کا درجہ دے کر ان کی پوجا کرنا ہماری تہذیب کی ایک منفرد خصوصیت ہے۔ بتکما تہوار تلنگانہ کی شاندار ثقافتی روایت کی عکاسی کرتا ہے، جسے شہری اور دیہی علاقوں میں عوام انتہائی عقیدت و احترام کے ساتھ مناتے ہیں۔
Advertising
شاندار تقریبات کا بہترین مرکز—ڈبلیو کنوینشن ہال،اے سی، نان اے سی انکولی روڈ، عادل آباد
کلکٹر نے کہا کہ خاندان کی تشکیل سے لے کر سماج کے ہر شعبے تک خواتین کا کردار انتہائی اہم ہے۔ ماں اور بیٹی کی حیثیت سے خواتین جو ذمہ داریاں نبھاتی ہیں، وہ انمول ہیں۔ انہوں نے واضح کیا کہ ضلع کے تمام محکمہ جات کے باہمی تعاون سے مستقبل میں بھی ایسے ثقافتی پروگرام مزید شاندار انداز میں منعقد کیے جائیں گے۔
بعد ازاں مہمانانِ خصوصی نے خواتین کے ساتھ بتکما گیتوں پر روایتی رقص میں حصہ لیا اور تہوار کی خوشیوں میں شریک ہوئے۔
اس پروگرام میں مقامی اداروں کے ایڈیشنل کلکٹر راجیشور، ڈی آر او سراونتی، میونسپل چیئرپرسن بنداری انوشا، ایس سی کارپوریشن کے ای ڈی منوہر، محکمہ خواتین و اطفال کی بہبود کی افسر ملکا، ضلع انٹرمیڈیٹ ایجوکیشن آفیسر گنیش، اقلیتی بہبود کے افسر کلیم، بی سی اور ایس سی ویلفیئر محکمہ جات کی افسران سونیا اور سنیita کماری کے علاوہ دیگر عہدیداران، خواتین، طالبات اور اساتذہ نے شرکت کی۔
