واٹر پلانٹ کے پاس ریچارج پِٹس تعمیر کرنے کی ہدایت
ٹیلرس اور پولیس کالونیوں میں ڈرینیج کے مسئلے کا مستقل حل کیا جائے گا ۔ ضلع کلکٹر راجَرشی شاہ
عادل آباد، 6 نومبر(تلنگانہ وائس) ضلع کلکٹر راجَرشی شاہ نے جمعہ کے روز عادل آباد شہر کے 14ویں وارڈ کے تحت آنے والی ٹیلرس کالونی اور پولیس کالونی کا تفصیلی دورہ کرتے ہوئے مقامی مسائل کا جائزہ لیا۔ اس موقع پر انہوں نے مقامی عوام سے براہِ راست بات چیت کرتے ہوئے ان کے مسائل دریافت کیے۔
کلکٹر نے کالونی میں واقع منرل واٹر پلانٹ کے قریب ریچارج پِٹس (انکُڈو گُنٹالو) کی تعمیر اور کالونی میں ڈرینیج نظام کا زمینی سطح پر معائنہ کیا۔ مقامی افراد نے بتایا کہ مناسب ڈرینیج نالیاں نہ ہونے کی وجہ سے گندہ پانی مکانات کے درمیان جمع ہو رہا ہے۔
اس پر کلکٹر نے بتایا کہ اس مسئلے کے مستقل حل کے لیے TUFIDC کے تحت مجموعی طور پر 2.80 کروڑ روپے کے فنڈس منظور کیے گئے ہیں۔ انہوں نے واضح کیا کہ 14ویں وارڈ کی ٹیلرس کالونی اور پولیس کالونی میں سی سی ڈرین اور کلورٹس کی تعمیر کے لیے ایک کروڑ روپے جبکہ وارڈ کے دیگر علاقوں میں سی سی سڑکوں، سی سی ڈرین اور کلورٹس کی تعمیر کے لیے مزید 1.80 کروڑ روپے منظور کیے گئے ہیں۔
Advertisment
شاندار تقریبات کا بہترین مرکز—ڈبلیو کنوینشن ہال،اے سی، نان اے سی انکولی روڈ، عادل آباد
انہوں نے بتایا کہ ٹینڈر کے عمل کی وجہ سے کاموں میں کچھ تاخیر ہوئی ہے، تاہم متعلقہ عہدیداروں کو ہدایت دی کہ فوری طور پر ڈرینیج کی سطح (لیول) کا جائزہ لیتے ہوئے اس بات کو یقینی بنایا جائے کہ کہیں بھی پانی جمع نہ ہو اور تمام تعمیراتی کام معیاری انداز میں مکمل کیے جائیں۔
بعد ازاں کلکٹر راجَرشی شاہ نے کہا کہ گھروں سے نکلنے والا فاضل اور گندہ پانی سڑکوں پر بہنے سے روکنے کے لیے ہر گھر کے احاطے میں لازمی طور پر ریچارج پِٹ تعمیر کی جائے۔ اس سے زیرِ زمین آبی ذخائر میں اضافہ ہوگا اور پانی کی سطح بہتر ہوگی۔
مقامی افراد نے بورویل کے پانی کے آلودہ ہونے اور اس کا رنگ تبدیل ہونے کی شکایت کی، جس پر کلکٹر نے متعلقہ عہدیداروں کو ہدایت دی کہ فوری طور پر مکینکوں کی مدد سے بورویل کی فلشنگ کرواکر انہیں صاف کیا جائے۔
اس دورے کے موقع پر میونسپل کمشنر جگدیشور گوڑ، موالا تحصیلدار وینو، مقامی کونسلر وینکٹیش، میونسپل انجینئرنگ شعبہ کے عہدیداروں، دیگر متعلقہ افسران اور عملے کے ارکان موجود تھے۔
