زیادہ سامان کے ساتھ گاڑی کی چھت پر مسافروں کی منتقلی، ڈرائیور کے خلاف مقدمہ
عادل آباد، 18/ اگست (تلنگانہ وائس) ایچوڈہ منڈل میں زیادہ سامان لاد کر گاڑی کی چھت پر مسافروں کو بٹھاکر خطرناک طریقے سے گاڑی چلانے والے ڈرائیور کے خلاف پولیس نے مقدمہ درج کرلیا۔ ایچوڈہ ایس ایچ او کے نریش کمار نے بتایا کہ گاڑی کو ضبط کرکے قانونی کارروائی شروع کردی گئی ہے۔
تفصیلات کے مطابق 16 اگست کو ایچوڈہ پولیس کے اے ایس آئی چے نانک سنگھ، کانسٹیبل اے رام ریڈی اور آر گنیش معمول کی گشت پر تھے۔ شام تقریباً 6 بجے میڈی گوڑہ کے قریب نرساپور سے اچوڈہ کی سمت آنے والی TG-01-T-0055 نمبر کی ٹاٹا انٹرا پک اَپ گاڑی کو زیادہ سامان کے ساتھ لاپرواہی سے چلتے ہوئے دیکھا گیا۔
Advertising
پولیس نے گاڑی روک کر تلاشی لی تو اس میں بڑی مقدار میں پیاز اور لہسن لدا ہوا تھا، جبکہ گاڑی کی چھت پر مسافر بھی سوار تھے۔ ڈرائیور کی شناخت ایچوڈہ منڈل کی رمضان پور کالونی کے رہنے والے عبدالغفار (34) کی حیثیت سے ہوئی۔
Advertising
پولیس کے مطابق پوچھ تاچھ میں ڈرائیور نے بتایا کہ کم وقت میں زیادہ آمدنی حاصل کرنے، ایندھن اور وقت کی بچت کے مقصد سے زیادہ سامان کے ساتھ گاڑی کی چھت پر مسافروں کو بھی منتقل کر رہا تھا۔ پولیس نے واضح کیا کہ اس طرح سفر کرنا مسافروں اور دیگر گاڑی سواروں کی جان کے لیے انتہائی خطرناک ہے۔
ایس ایچ او نریش کمار نے بتایا کہ گاڑی اور ڈرائیور کو پولیس اسٹیشن منتقل کرکے مقدمہ درج کیا گیا ہے۔ پولیس نے خبردار کیا کہ مسافروں کی جان کو خطرے میں ڈالنے والے اوور لوڈنگ اور گاڑیوں کی چھت پر مسافروں کو بٹھانے جیسے اقدامات کے خلاف سخت کارروائی کی جائے گی۔
