وانا مہوتسو کے اہداف مقررہ مدت میں مکمل کریں ۔ ریاستی وزیر کونڈا سریکھا
کل بڑے پیمانے پر شجرکاری مہم چلائی جائے
عادل آباد، 24 اگست(تلنگانہ وائس) ریاستی وزیر جنگلات و دیوادایہ کونڈا سریکھا نے عہدیداروں کو ہدایت دی کہ وانا مہوتسو کے تحت مقرر کردہ شجرکاری کے اہداف کو مقررہ مدت میں مکمل کیا جائے۔ انہوں نے پیر کے روز محکمہ جنگلات کے اعلیٰ عہدیداروں کے ہمراہ تمام اضلاع کے کلکٹرس کے ساتھ ویڈیو کانفرنس کے ذریعہ وانا مہوتسو پروگرام کا جائزہ لیا۔
اس موقع پر وزیر نے کہا کہ منگل کے روز تمام اضلاع میں بڑے پیمانے پر شجرکاری پروگرام منعقد کیا جائے۔ انہوں نے ضلع وار مقرر کردہ اہداف، اب تک لگائے گئے پودوں کی تعداد، باقی ماندہ ہدف، نرسریوں میں دستیاب پودوں اور جیو ٹیگنگ سمیت دیگر امور کی تفصیلات حاصل کیں۔
Advertising
انہوں نے کہا کہ ریاست میں اس وقت بارشیں جاری ہیں، اس لیے اس سازگار موقع سے استفادہ کرتے ہوئے شجرکاری کے اہداف کو جلد مکمل کیا جائے۔ انہوں نے طلبہ، این سی سی، این ایس ایس رضاکاروں، عہدیداروں، عوامی نمائندوں اور خواتین سیلف ہیلپ گروپس سے کل منعقد ہونے والی بڑے پیمانے کی شجرکاری مہم میں بھرپور حصہ لینے کی اپیل کی۔
Advertising
وزیر نے سرکاری تعلیمی اداروں، سرکاری دفاتر اور اربن فاریسٹ پارکس سمیت مختلف مقامات پر وسیع پیمانے پر پودے لگانے کی ہدایت دی۔ انہوں نے واضح کیا کہ صرف پودے لگانا کافی نہیں بلکہ ان کی مناسب نگہداشت بھی ضروری ہے۔ ہر پودے کے تحفظ کے لیے باڑ لگانے اور لازمی طور پر جیو ٹیگنگ کرنے کی ہدایت دی۔
Advertising
کلکٹریٹ سے کلکٹر راجرشی شاہ کی شرکت
ویڈیو کانفرنس میں عادل آباد کلکٹریٹ کے ویڈیو ہال سے ضلع کلکٹر راجرشی شاہ نے متعلقہ عہدیداروں کے ہمراہ شرکت کی۔ ویڈیو کانفرنس کے اختتام کے بعد کلکٹر نے عہدیداروں کو ہدایت دی کہ منگل کو منعقد ہونے والے بڑے پیمانے کی شجرکاری پروگرام کو کامیاب بنایا جائے۔
انہوں نے محکمہ جنگلات، دیہی ترقی، پنچایت راج، میونسپل انتظامیہ سمیت دیگر محکموں کے عہدیداروں کو باہمی تال میل کے ساتھ کام کرتے ہوئے باقی ماندہ اہداف کو تیزی سے مکمل کرنے کی ہدایت دی۔ انہوں نے عہدیداروں، عوامی نمائندوں اور طلبہ سے بڑی تعداد میں شجرکاری مہم میں حصہ لینے کی اپیل کی۔
Advertising
اجلاس میں عادل آباد اور ایچوڑہ کے فاریسٹ ڈیولپمنٹ آفیسرس وشواناتھ بوساریڈی، پرتھمیش، ڈی آر ڈی او رویندر، ایڈیشنل ڈی آر ڈی او رام پرساد، اے پی ڈی گجانند سمیت مختلف محکموں کے عہدیداروں اور ملازمین نے شرکت کی۔
