ڈبل بیڈروم مکانات میں بنیادی سہولیات کے کام تیز کیے جائیں
مقررہ مدت میں تمام کام مکمل کرکے مکانات استفادہ کنندگان کے حوالے کرنے کی تیاری کی جائے ۔ کلکٹر راج رشی شاہ
عادل آباد، 6 اکتوبر 2026(تلنگانہ وائس) ضلع کلکٹر راجرشی شاہ نے عہدیداروں کو ہدایت دی کہ ضلع کے غریب خاندانوں کے لیے مختص ڈبل بیڈروم مکانات میں بنیادی سہولیات کی فراہمی کے کاموں میں تیزی لائی جائے اور تمام ضروری سہولیات کی تکمیل کے بعد مکانات استفادہ کنندگان کے حوالے کیے جائیں۔
منگل کو کلکٹریٹ میں اپنے چیمبر میں کلکٹر نے ڈبل بیڈروم مکانات کی تعمیر کی پیش رفت، کالونیوں میں بیرونی پینٹنگ، داخلی سڑکوں، پینے کے پانی کی سربراہی سمیت دیگر امور کا متعلقہ عہدیداروں کے ساتھ جائزہ لیا۔
Advertising
اس موقع پر کلکٹر نے کہا کہ ڈبل بیڈروم مکانات کی کالونیوں میں بنیادی سہولیات کی فراہمی کو اولین ترجیح دی جائے۔ مکانات کی بیرونی خوبصورتی کے لیے معیاری پینٹنگ کے کام جلد مکمل کیے جائیں۔
Advertising
انہوں نے کالونیوں میں آمدورفت میں دشواری نہ ہو، اس کے لیے داخلی گریول سڑکوں کی تعمیر کے کاموں میں بھی تیزی لانے کی ہدایت دی۔ ہر مکان کو محفوظ پینے کا پانی فراہم کرنے کے لیے ضروری اقدامات کرنے اور پائپ لائن کی توسیع، نلوں کی فٹنگ سمیت دیگر کام جلد مکمل کرنے پر زور دیا۔
کلکٹر نے عہدیداروں کو ہدایت دی کہ مستقبل میں پینے کے پانی کی قلت کا مسئلہ پیدا نہ ہو، اس کے لیے فیلڈ سطح پر حالات کا جائزہ لے کر ضرورت کے مطابق بنیادی سہولیات فراہم کی جائیں۔ انجینئرنگ عہدیدار کاموں کے معیار کی مسلسل نگرانی کریں۔
Advertising
انہوں نے کہا کہ تمام کام مقررہ مدت کے اندر مکمل کرکے مکانات کو استفادہ کنندگان کے حوالے کرنے کے لیے تیار رکھا جائے۔ کاموں میں تاخیر سے بچنے کے لیے متعلقہ محکمہ جات کے عہدیدار آپسی تال میل کے ساتھ کام کریں۔
اس اجلاس میں مقامی اداروں کے ایڈیشنل کلکٹر راجیشور، ایڈیشنل کلکٹر آر. ایس. چِترو سمیت مختلف محکمہ جات کے عہدیدار اور عملہ موجود تھا۔
