نقلی بابا گرفتار، محبت کی شادی کرنے والی لڑکی کو واپس لانے کے نام پر 30 ہزار روپے کا فراڈ
عادل آباد، 8/ جولائی (تلنگانہ وائس)عادل آباد ون ٹاؤن پولیس نے ایک ایسے نقلی بابا کو گرفتار کر کے عدالتی ریمانڈ پر بھیج دیا ہے جس نے محبت کی شادی کر کے گھر سے جانے والی ایک نوجوان خاتون کو "مخفی طاقتوں” کے ذریعے واپس لانے کا جھانسہ دے کر 30 ہزار روپے ہتھیا لیے۔
ون ٹاون سی آئی بی سنیل کمار نے صحافیوں کو بتایا کہ ہاؤسنگ بورڈ کالونی کے رہائشی گڈم شیوا پرساد سے ملزم ایس کے منیر نے رابطہ کیا اور دعویٰ کیا کہ وہ اس کی بھانجی، جو محبت کی شادی کر کے چلی گئی تھی، کو جادوئی منتروں اور مخفی طاقتوں کے ذریعے واپس لا سکتا ہے۔ اس دعوے پر یقین دلاتے ہوئے اس نے ابتدائی طور پر 25 ہزار روپے وصول کیے۔
Advertisment
چھ ماہ گزرنے کے باوجود کوئی نتیجہ برآمد نہ ہونے پر متاثرہ شخص نے اپنی رقم واپس مانگی تو ملزم نے مزید 5 ہزار روپے کا مطالبہ کیا اور رقم نہ دینے کی صورت میں مخفی طاقتوں کے ذریعے پورے خاندان کو تباہ کرنے اور جان سے مارنے کی دھمکیاں دیں۔ خوفزدہ ہو کر متاثرہ نے مزید 5 ہزار روپے بھی ادا کر دیے۔
بعد ازاں خود کو دھوکہ دہی کا شکار محسوس کرتے ہوئے گڈم شیوا پرساد نے ون ٹاؤن پولیس اسٹیشن میں شکایت درج کرائی۔ پولیس نے مقدمہ درج کر کے تفتیش کے دوران ملزم ایس کے منیر کو گرفتار کر لیا اور عدالت میں پیش کیا، جہاں سے اسے عدالتی ریمانڈ پر بھیج دیا گیا۔
ون ٹاؤن پولیس اسٹیشن کے انسپکٹر بی سنیل کمار نے عوام سے اپیل کی کہ وہ جادو ٹونے، عملیات یا مخفی طاقتوں کے نام پر لوگوں کو گمراہ کرنے والے جعلی باباؤں اور دھوکے بازوں کے جھانسے میں نہ آئیں۔ انہوں نے کہا کہ اس نوعیت کی کسی بھی دھوکہ دہی کی صورت میں فوری طور پر قریبی پولیس اسٹیشن سے رجوع کریں۔
