پراجا دربار میں عوامی مسائل کی سماعت، ہر درخواست پر مؤثر کارروائی ہوگی ۔ کندی سرینواس ریڈی
عادل آباد، 26/ جون(تلنگانہ وائس)عادل آباد کانگریس کے اسمبلی انچارج کندی سرینواس ریڈی نے کہا ہے کہ عوام کے مسائل کا بروقت حل ان کی اولین ترجیح ہے اور اسی مقصد کے تحت باقاعدگی سے پراجا دربار کا انعقاد کیا جا رہا ہے، تاکہ ہر شہری کو اپنی شکایت اور مسئلہ براہِ راست پیش کرنے کا موقع مل سکے۔
جمعرات کے روز شہر میں واقع اپنے کیمپ آفس میں منعقدہ پراجا دربار میں انہوں نے اپنی اہلیہ کندی مونا سرینواس ریڈی کے ہمراہ عوام سے ملاقات کی۔ اس دوران اسمبلی حلقہ کے مختلف دیہات، وارڈس اور کالونیوں سے تعلق رکھنے والے شہریوں، پارٹی قائدین اور کارکنوں نے شرکت کرتے ہوئے ذاتی، سماجی اور بنیادی سہولیات سے متعلق مسائل پر مشتمل درخواستیں پیش کیں۔
کندی سرینواس ریڈی نے کہا کہ پراجا دربار میں موصول ہونے والی تمام درخواستوں کو جدید ٹیکنالوجی کے ذریعے ڈیجیٹل طور پر محفوظ کیا جا رہا ہے، تاکہ ہر درخواست کی پیش رفت پر مسلسل نظر رکھی جا سکے اور متعلقہ مسائل کے حل میں تاخیر نہ ہو۔
انہوں نے عوام کو یقین دلایا کہ ہر درخواست کا سنجیدگی سے جائزہ لیا جائے گا اور متعلقہ حکام سے رابطہ کرکے مسائل کے حل کے لیے ہر ممکن کوشش کی جائے گی۔ انہوں نے عوام سے اپیل کی کہ وہ بلاجھجک اپنے مسائل تحریری درخواستوں کی صورت میں پیش کریں تاکہ ان کے ازالے کے لیے مؤثر اقدامات کیے جا سکیں۔
اس موقع پر آتما کمیٹی کے چیئرمین گمّا سنتوش، سینئر کانگریس رہنما دگمبر راؤ پاٹل، سابق میونسپل فلور لیڈر بنڈاری ستیش، شاہد علی، سدھاکر گوڑ، اناپورنا، محبوب علی، رفیق، ایم اے شکیل، منیگیلا وِٹھل، الچیٹی ناگنّا، سکھیندر، بیلوری رام ریڈی اور دیگر قائدین و کارکنان موجود تھے۔
