عادل آباد: کانگریس اسمبلی انچارج کندی سرینواس ریڈی کی ایم ایل اے پائل شنکر پر سخت تنقید
عادل آباد، 19/ جولائی(تلنگانہ وائس) کانگریس پارٹی کے عادل آباد اسمبلی انچارج کندی سرینواس ریڈی نے بی جے پی ایم ایل اے پائل شنکر پر شدید تنقید کرتے ہوئے الزام عائد کیا کہ وہ سرکاری اور اسائنڈ اراضی پر قبضوں میں ملوث ہیں اور عوام کے حقوق پامال کر رہے ہیں۔
اتوار کو تلمڈوگو منڈل کے برم پور میں منعقدہ ایس آئی آر اجلاس میں مبصرین کے ہمراہ شرکت کے بعد میڈیا سے گفتگو کرتے ہوئے انہوں نے کہا کہ عوام کے مسائل کو دیکھتے ہوئے کانگریس مسلسل جدوجہد کر رہی ہے۔ انہوں نے دعویٰ کیا کہ تقریباً 7 کروڑ روپے مالیت کی اسائنڈ زمین پائل شنکر نے اپنی اہلیہ کے نام رجسٹر کروا کر غیر قانونی فائدہ اٹھایا ہے۔
Advertising
کندی سرینواس ریڈی نے کہا کہ آئندہ انتخابات میں ایم ایل اے پائل شنکر کو عوام مناسب سبق سکھائیں گے اور انہیں ڈپازٹ ضبط ہونے کے ساتھ شکست ہوگی۔ انہوں نے اعلان کیا کہ وہ عوام کی جانب سے زمینوں پر قبضوں کے خلاف اپنی جدوجہد جاری رکھیں گے اور پائل شنکر کی سیاسی شکست ہی ان کا بنیادی ہدف ہے۔
Advertising
انہوں نے کانگریس کے ایک مقامی رہنما کو بھی تنقید کا نشانہ بناتے ہوئے کہا کہ ریاستی حکومت کی فلاحی اسکیموں کا کریڈٹ وزیر اعلیٰ ریونت ریڈی اور وزراء کو ملنا چاہیے، نہ کہ اپوزیشن ایم ایل اے کی تعریف کی جائے۔
Advertising
اس موقع پر سابق رکن اسمبلی آری پلی موہن، جی اے سی چیئرمین کوٹناک تروپتی، ڈی سی سی صدر نریش جادھو، آڈے گجیندر، خضر پاشا، شری کانت ریڈی، گمّا سنتوش سمیت کانگریس کے متعدد قائدین موجود تھے۔
