ملعون راجہ سنگھ کے متنازع پوسٹر کے معاملے میں HYC بانی سلمان خان پر مقدمہ
حیدرآباد، 14 اگست(تلنگانہ وائس نیوز) حیدرآباد یوتھ کوریج (HYC) کے بانی و بی آر ایس پارٹی لیڈر سلمان خان کے خلاف مہدی پٹنم پولیس نے جمعہ کو مقدمہ درج کیا۔ الزام ہے کہ انہوں نے گوشامحل کے رکن اسمبلی ملعون ٹی راجہ سنگھ کی تصویر والا ایک قابلِ اعتراض پوسٹر ان کے گھر کے سامنے نصب کیا اور عوام سے اس پر دستخط کرنے کی اپیل کی۔
پولیس کے مطابق منگل ہاٹ کے رہائشی وی لکشمن کی شکایت پر کارروائی کی گئی۔ شکایت کنندہ نے مبینہ طور پر سلمان خان اور دو دیگر افراد کی ویڈیوز سوشل میڈیا پر دیکھنے کے بعد پولیس سے رجوع کیا۔
Advertising
شکایت میں دعویٰ کیا گیا کہ پوسٹر پر راجہ سنگھ کی تصویر کے ساتھ جوتے کا نشان بھی بنایا گیا تھا۔ شکایت کنندہ نے پولیس کو مبینہ ویڈیوز کے انسٹاگرام اور فیس بک لنکس بھی فراہم کیے، تاہم پولیس کے مطابق بعد میں یہ ویڈیوز سوشل میڈیا سے ہٹا دی گئیں۔
Advertising
مہدی پٹنم پولیس نے بھارتیہ نیائے سنہتا (BNS) کی دفعات 196، 299، 352، 292 اور دفعہ 3(5) کے تحت مقدمہ درج کیا ہے۔ ان دفعات کا تعلق مختلف گروہوں کے درمیان دشمنی کو فروغ دینے، مذہبی جذبات مجروح کرنے، امن میں خلل ڈالنے کے ارادے سے توہین اور عوامی پریشانی جیسے معاملات سے ہے۔
Advertising
مہدی پٹنم پولیس کے اسٹیشن ہاؤس آفیسر ایس مالیش نے بتایا کہ شکایت میں لگائے گئے الزامات کی فی الحال تحقیقات کی جا رہی ہیں۔ پولیس نے واضح کیا کہ تحقیقات مکمل ہونے تک پوسٹر سے متعلق الزامات کو حتمی طور پر ثابت شدہ واقعہ قرار دینا قبل از وقت ہوگا۔
