سرکاری اسکولوں کے طلبہ کی شاندار کامیابی، باسر ٹرپل آئی ٹی میں 65 نشستیں حاصل
ضلع کلکٹر راجرشی شاہ نے ہونہار طلبہ کو مبارکباد دی
سرکاری اسکول نجی اداروں کا بہترین متبادل، والدین اپنے بچوں کا داخلہ سرکاری اسکولوں میں کروائیں: کلکٹر
عادل آباد، 14/ جون(تلنگانہ وائس)
ضلع عادل آباد کے سرکاری اسکولوں کے طلبہ نے ایک بار پھر اپنی صلاحیتوں کا لوہا منواتے ہوئے باسر ٹرپل آئی ٹی (آر جی یو کے ٹی) میں داخلوں کے دوران نمایاں کامیابی حاصل کی ہے۔ جاریہ تعلیمی سال کے لیے ضلع کے 65 طلبہ ٹرپل آئی ٹی میں نشستیں حاصل کرنے میں کامیاب ہوئے ہیں، جس پر ضلع بھر میں خوشی کی لہر دوڑ گئی ہے۔
سرکاری اعداد و شمار کے مطابق داخلوں کے پہلے مرحلے میں 58 طلبہ جبکہ حال ہی میں جاری کردہ دوسرے مرحلے میں مزید 7 طلبہ کا انتخاب عمل میں آیا۔ یہ تمام طلبہ سرکاری اسکولوں سے تعلیم حاصل کرنے والے ہیں، جو ضلع کے تعلیمی معیار کا منہ بولتا ثبوت ہے۔
ضلع کلکٹر عادل آباد راجرشی شاہ نے کامیاب طلبہ کو مبارکباد پیش کرتے ہوئے کہا کہ سرکاری اسکولوں کے طلبہ کی یہ کامیابی اس بات کا واضح ثبوت ہے کہ محنت، لگن اور معیاری تدریس کے ذریعے اعلیٰ تعلیمی اداروں تک رسائی حاصل کی جا سکتی ہے۔ انہوں نے طلبہ کی کامیابی میں اہم کردار ادا کرنے والے اساتذہ اور والدین کی بھی بھرپور ستائش کی۔
ضلع کلکٹر نے کہا کہ ریاستی حکومت سرکاری اسکولوں کو جدید سہولیات سے آراستہ کرنے کے لیے مسلسل اقدامات کر رہی ہے تاکہ طلبہ کو نجی تعلیمی اداروں کے مساوی ماحول فراہم کیا جا سکے۔ انہوں نے والدین سے اپیل کی کہ وہ 15 جون سے نئے تعلیمی سال کے آغاز کے موقع پر اپنے بچوں کو سرکاری اسکولوں میں داخل کروائیں۔
انہوں نے بتایا کہ سرکاری اسکولوں میں کشادہ جماعتی کمرے، صاف پینے کا پانی، جدید بیت الخلاء، ڈیجیٹل لرننگ سہولیات، مفت نصابی کتب اور نوٹ بکس فراہم کی جا رہی ہیں۔ اس کے علاوہ طلبہ کو مفت ناشتے اور دوپہر کے کھانے کی سہولت بھی دی جا رہی ہے۔
ضلع کلکٹر کے مطابق خان اکیڈمی اور فزکس والا جیسے جدید تعلیمی پلیٹ فارمز کے ذریعے معیاری ڈیجیٹل تعلیم فراہم کی جا رہی ہے، جبکہ ہائی اسکولوں میں انٹرایکٹو فلیٹ پینلز (IFPs) نصب کر کے جدید ٹیکنالوجی پر مبنی تدریس کو فروغ دیا جا رہا ہے۔
انہوں نے کہا کہ آج سرکاری اسکول معیاری تعلیم، جدید سہولیات اور بہترین نتائج کے باعث طلبہ کے روشن مستقبل کی مضبوط بنیاد بن رہے ہیں، لہٰذا والدین کو چاہیے کہ وہ ان مواقع سے بھرپور استفادہ کریں۔
