کاماریڈی میں 13/جولای کو نیشنل ڈی وارمنگ ڈے
کے موقع پر 2.46 لاکھ بچوں کو مفت البینڈازول گولیاں پلائی جائیں گی”ڈی ایم اینڈ ایچ او”
کاماریڈی 12/جولائی(سید کوثر علی/تلنگانہ وائس) قومی یومِ انسدادِ آنتوں کے کیڑوں (نیشنل ڈی ورمنگ ڈے) کے موقع پر 13 جولائی 2026 کو ضلع کاماریڈی میں ایک سے انیس سال عمر کے 2 لاکھ 46 ہزار 177 بچوں کو مفت البینڈازول گولیاں دی جائیں گی۔ جو بچے اس روز گولی نہیں لے سکیں گے، انہیں 20 جولائی کو منعقد ہونے والے موپ اَپ راؤنڈ میں یہ دوا فراہم کی جائے گی۔
Advertisment
ضلع میڈیکل اینڈ ہیلتھ آفیسر ڈاکٹر جے وینکٹی نے پریس نوٹ میں بتایا کہ آنتوں کے کیڑے بچوں میں خون کی کمی، غذائی قلت، جسمانی و ذہنی نشوونما میں رکاوٹ، کمزوری اور تعلیمی کارکردگی پر منفی اثرات کا باعث بنتے ہیں۔ ان کے خاتمے کے لیے حکومت ہند ہر سال قومی سطح پر انسدادِ آنتوں کے کیڑوں کی مہم چلاتی ہے۔
انہوں نے بتایا کہ ضلع کے تمام آنگن واڑی مراکز، سرکاری و خانگی اسکولوں، گروکل، کستوربا، آشرم اسکولوں، جونیئر کالجوں اور اسکول نہ جانے والے بچوں کو بھی اس مہم کے تحت دوا دی جائے گی۔ ایک سے دو سال کے بچوں کو آدھی گولی پیس کر جبکہ دو سے انیس سال کے بچوں کو 400 ملی گرام کی مکمل گولی چبا کر کھلائی جائے گی۔ڈی ایم اینڈ ایچ او نے والدین سے اپیل کی کہ وہ 13 جولائی کو اپنے بچوں کو لازماً البینڈازول گولی دلوائیں، اور اگر کسی وجہ سے اس دن دوا نہ مل سکے تو 20 جولائی کے موپ اَپ راؤنڈ میں ضرور شامل کریں۔ انہوں نے کہا کہ البینڈازول مکمل طور پر محفوظ، مؤثر اور مفت دوا ہے۔ ساتھ ہی ہاتھوں کی صفائی، صاف پانی کا استعمال، بیت الخلا کے استعمال اور جوتے پہننے جیسی عادات اپنانے پر بھی زور دیا تاکہ بچوں کو آنتوں کے کیڑوں سے محفوظ رکھا جا سکے۔
