عادل آباد۔15/جولائی(تلنگانہ وائس)
ضلع کلکٹر عادل آباد راجرشی شاہ نے طلبہ کو مشورہ دیا ہے کہ وہ سوشل میڈیا سے دور رہتے ہوئے پوری توجہ کے ساتھ تعلیم حاصل کریں۔ انہوں نے یہ بات چہارشنبہ کے روز سونالا منڈل کے پی ایم شری زیڈ پی سیکنڈری اسکول میں منعقدہ "آروگیہ پاٹھ شالا” پروگرام سے خطاب کرتے ہوئے کہی۔
کلکٹر نے کہا کہ طلبہ کو سنٹرلائزڈ کچن کے ذریعے دوپہر کے کھانے کے ساتھ صبح کے وقت راگی جاوا (ناچنی کا دلیہ) جیسی غذائیت بخش خوراک بھی فراہم کی جائے گی، جس سے بالخصوص طالبات میں خون کی کمی کی روک تھام میں مدد ملے گی۔ انہوں نے طلبہ پر زور دیا کہ وہ جنک فوڈ اور چپس جیسی غیر صحت بخش غذاؤں سے پرہیز کریں اور نظم و ضبط پر مبنی طرزِ زندگی اختیار کریں۔
انہوں نے بتایا کہ طلبہ کے مسائل کے فوری حل کے لیے اسکول میں گریوینس ریڈریسل کمیٹی کے تحت شکایتی صندوق (کمپلینٹ باکس) قائم کیا گیا ہے، جہاں موصول ہونے والی شکایات کا جائزہ لے کر مناسب کارروائی کی جائے گی۔
Advertising
ضلع کلکٹر راجَرشی شاہ نے کہا کہ طلبہ اپنی شخصیت کی تعمیر کے لیے ڈاکٹر اے پی جے عبدالکلام، ڈاکٹر بی آر امبیڈکر اور ایس آر شنکرن جیسی عظیم شخصیات کی زندگی سے سبق حاصل کریں۔ انہوں نے طلبہ کو ہدایت دی کہ موبائل فون صرف تعلیمی مقاصد کے لیے استعمال کریں اور ریلز، انسٹاگرام اور فیس بک جیسے سوشل میڈیا پلیٹ فارمز سے دور رہتے ہوئے کھیلوں میں بھی نمایاں کارکردگی کا مظاہرہ کریں۔
کلکٹر نے اعلان کیا کہ اسکول کی ترقی کے لیے ڈی آر ڈی او کے تعاون سے نیوٹری گارڈن، کمپاؤنڈ وال، کچن شیڈ اور بیت الخلاء کی تعمیر کے لیے جلد فنڈز جاری کیے جائیں گے، جبکہ منڈل میں نئے ایم آر او دفتر کی عمارت کی تعمیر بھی جلد شروع کی جائے گی۔
Advertising
بعد ازاں انہوں نے اسکول کی لائبریری اور نیوٹری گارڈن کا افتتاح کیا، پودا لگا کر پانی دیا اور شکایتی صندوق میں موصول درخواستوں کا جائزہ لیتے ہوئے متعلقہ حکام کو ضروری کارروائی کی ہدایت دی۔
Advertising
اس موقع پر ڈی ای او مادھوی، ڈی آر ڈی او رویندر راتھوڑ، ایم آر او ملیش، ایم پی ڈی او رتناکر راؤ، ایم ای او حسین، سرپنچ بندوجا، ہیڈ ماسٹر سچن، محکمہ تعلیم کے عہدیداران، وی ڈی سی اراکین اور دیگر متعلقہ افسران و عملہ موجود تھا۔
Advertising
