یوتھ ڈیکلریشن نہیں، کانگریس کے لیے ڈیتھ ڈیکلریشن ہے ۔ کے ٹی آر
حیدرآباد۔19/جولائی(تلنگانہ وائس) بھارت راشٹرا سمیتی (بی آر ایس) کے ورکنگ صدر کے ٹی راما راؤ (کے ٹی آر) نے سرور نگر میں منعقدہ یوا سنگرام سدیسّو سے خطاب کرتے ہوئے کانگریس حکومت پر شدید تنقید کی۔ انہوں نے کہا کہ کانگریس نے نوجوانوں کو "یوتھ ڈیکلریشن” کے نام پر دھوکہ دیا ہے، جبکہ حقیقت میں یہ کانگریس کے لیے "ڈیتھ ڈیکلریشن” ثابت ہوگا۔
کے ٹی آر نے الزام لگایا کہ ریاست میں نوکریوں کے نوٹیفکیشن جاری کرنے کے بجائے "لوٹیفکیشن” جاری کیے جا رہے ہیں۔ انہوں نے کہا کہ تلگو اور انگریزی کیلنڈر تو بدل گئے، مگر آج تک جاب کیلنڈر جاری نہیں کیا گیا۔ انہوں نے سوال کیا کہ کیا حکومت بے روزگار نوجوانوں کو روزگار دینے کے بجائے خودکشی کرنے پر مجبور کرنا چاہتی ہے؟
Advertising
انہوں نے کہا کہ کانگریس حکومت "روزگار کے کمبھ میلے” کے نام پر بدعنوانیوں کا میلہ سجا رہی ہے۔ کے ٹی آر نے چیلنج کرتے ہوئے کہا کہ اگر موجودہ حکومت واقعی 70 ہزار سرکاری ملازمتیں فراہم کر دے تو وہ سیاست چھوڑ دیں گے اور راہول گاندھی کے حق میں نعرہ بھی لگائیں گے۔
Advertising
انہوں نے دعویٰ کیا کہ بی آر ایس حکومت کے دور میں 1,60,083 سرکاری ملازمتیں فراہم کی گئیں، جبکہ موجودہ حکومت سابق حکومت کی کامیابیوں کا کریڈٹ چرانے کی کوشش کر رہی ہے۔ انہوں نے وزیر اعلیٰ ریونت ریڈی سے سوال کیا کہ کیا کے سی آر حکومت کی دی گئی ملازمتوں کو اپنی کامیابی بتاتے ہوئے انہیں شرم نہیں آتی؟
کے ٹی آر نے کہا کہ دہلی سے راہول گاندھی اور پرینکا گاندھی کو لا کر نوجوانوں کو گمراہ کرنے کی کوشش کی جا رہی ہے۔ انہوں نے الزام لگایا کہ کانگریس قیادت نوجوانوں کے ساتھ جعلی ہمدردی کا اظہار کر رہی ہے، جبکہ اقتدار میں آنے کے بعد اپنے وعدوں کو فراموش کر چکی ہے۔
Advertising
انہوں نے نوجوانوں سے اپیل کی کہ وہ ریاست کی موجودہ صورتحال پر سنجیدگی سے غور کریں اور کہا کہ وہ ایک بڑے بھائی کی حیثیت سے بے روزگار نوجوانوں کی ذمہ داری لینے اور ان کے ساتھ کھڑے رہنے کا وعدہ کرتے ہیں۔
