ضلع کانگریس ایس سی ڈپارٹمنٹ کی ضلعی ورکنگ کمیٹی اور منڈل صدور کی تقرریوں کی فہرست جاری
عادل آباد، 28/ جولائی (تلنگانہ وائس)
ضلع کانگریس ایس سی ڈپارٹمنٹ کو گاؤں سے لے کر ضلع سطح تک مزید مضبوط بنانے کے مقصد سے تلنگانہ پردیش کانگریس کمیٹی (ٹی پی سی سی) کے ایس سی ڈپارٹمنٹ کے ریاستی صدر و رکن اسمبلی کووم پلی ستیہ نارائنہ کی ہدایات پر ضلع کانگریس ایس سی ڈپارٹمنٹ کی ضلعی ورکنگ کمیٹی کے ارکان اور مختلف منڈل صدور کی تقرریوں کی فہرست جاری کردی گئی۔ یہ بات ضلع چیئرمین پرمیشور کولیٹکر نے بتائی۔
انہوں نے کہا کہ ان تقرریوں کا مقصد کانگریس پارٹی کے نظریات کو عوام تک پہنچانا، درج فہرست ذات (ایس سی) طبقات کے مسائل حکومت کی توجہ میں لانا، فلاحی اسکیموں کے نفاذ کی نگرانی کرنا اور گاؤں کی سطح سے پارٹی تنظیم کو مزید مستحکم بنانا ہے۔
Advertising
پرمیشور کولیٹکر نے بتایا کہ ایس سی ڈپارٹمنٹ میں سماجی توازن کو برقرار رکھتے ہوئے تمام طبقات کو مناسب نمائندگی دی گئی ہے اور پارٹی کے لیے مخلصانہ خدمات انجام دینے والے کارکنوں اور قائدین کو مختلف ذمہ داریاں سونپی گئی ہیں۔
Advertising
انہوں نے امید ظاہر کی کہ ان تقرریوں کے ذریعے ضلع بھر میں ایس سی ڈپارٹمنٹ مزید مضبوط ہوگا اور پارٹی کے پروگراموں کو عوام تک مؤثر انداز میں پہنچانے میں مدد ملے گی۔
Advertising
انہوں نے کہا کہ وزیراعلیٰ اے ریونت ریڈی، ٹی پی سی سی صدر مہیش کمار گوڑ، ریاستی ایس سی ڈپارٹمنٹ کے صدر کووم پلی ستیہ نارائنہ، عادل آباد پارلیمانی حلقہ ایس سی ڈپارٹمنٹ کے آبزرور سمتا سدرشن اور ڈی سی سی صدر ڈاکٹر نریش جادھو کی رہنمائی میں یہ تقرریاں ضلع میں ایس سی ڈپارٹمنٹ کو مزید فعال بنانے میں اہم کردار ادا کریں گی۔
آخر میں نو منتخب ضلعی ورکنگ کمیٹی کے ارکان اور منڈل صدور کو مبارکباد پیش کرتے ہوئے انہوں نے کہا کہ وہ پارٹی کے نظریات، عوامی مسائل کے حل، سماجی انصاف کے فروغ اور کانگریس پارٹی کی مضبوطی کے لیے بھرپور انداز میں کام کریں۔
"جے بھیم – جے کانگریس”
