عادل آباد میں اقلیتی گروکل اسکولوں میں معیاری تعلیم اور بہتر سہولیات فراہم کی جائیں ۔ کلکٹر راجرشی شاہ
عادل آباد، 28/ جولائی (تلنگانہ وائس)
ضلع کلکٹر راجرشی شاہ نے ہدایت دی ہے کہ ضلع کے اقلیتی رہائشی اسکولوں اور جونیئر کالجوں میں طلبہ کو معیاری تعلیم، بہتر رہائشی سہولیات اور غذائیت سے بھرپور خوراک کی فراہمی کو یقینی بنانے کے لیے خصوصی اقدامات کیے جائیں۔
منگل کو کلکٹریٹ میں منعقدہ جائزہ اجلاس میں کلکٹر نے تعلیمی کارکردگی، داخلوں، امتحانی نتائج، خوراک کے معیار اور بنیادی سہولیات کا تفصیلی جائزہ لیا۔ اجلاس میں مختلف اسکولوں کے پرنسپلوں کی جانب سے پیش کردہ مسائل پر غور کرتے ہوئے متعلقہ محکموں کو فوری حل کی ہدایت دی گئی۔
Advertising
کلکٹر نے گرلز-1 اسکول میں فرنیچر اور پینے کے پانی کے مسائل حل کرنے، باؤنڈری وال پر سولر فینسنگ نصب کرنے اور گرلز-2 اسکول میں کمپیوٹر اساتذہ کی کمی کے پیش نظر مستقل اساتذہ کو کمپیوٹر کی تربیت فراہم کرنے کی ہدایت کی۔
انہوں نے ایچوڈا، اُٹنور اور بنگاری گوڑہ کے اقلیتی رہائشی اسکولوں میں ڈائننگ ہال، بیت الخلا، باؤنڈری وال، سڑک، پینے کے پانی اور بجلی سے متعلق زیر التوا کام جلد مکمل کرنے کا حکم دیا۔ اسی طرح بوائز-1 اسکول میں رنگ و روغن، مرمت اور بیت الخلا کے کام بھی فوری مکمل کرنے کی ہدایت دی۔
Advertising
ضلع کلکٹر راجرشی شاہ نے پرنسپلوں کو ہدایت دی کہ طلبہ کے تعلیمی نتائج بہتر بنانے کے لیے معیاری تدریس کے ساتھ غذائیت سے بھرپور خوراک کی فراہمی پر خصوصی توجہ دی جائے۔ انہوں نے کہا کہ ہر ہفتے ڈی ایم ڈبلیو، آر ایل سی، ویجلنس اور اکیڈمک کوآرڈینیٹرز پر مشتمل مشترکہ ٹیم ایک اسکول کا معائنہ کرکے رپورٹ پیش کرے، جبکہ ہر ماہ جامع رپورٹ بھی جمع کرائی جائے۔
Advertising
اجلاس میں ایڈیشنل کلکٹرس راجیشور اور آر ایس چترو، ضلع پنچایت افسر رمیش، ضلع اقلیتی بہبود افسر شیخ کلیم احمد، ضلع طبی و صحت افسر سادھنا، میونسپل کمشنر جگدیشور گوڑ، اقلیتی رہائشی اسکولوں اور جونیئر کالجوں کے پرنسپل، وارڈنز اور متعلقہ افسران نے شرکت کی۔
Advertising
نوٹ۔ ہمارے گھر پر ہر اتوار کو مفت تشخیص و علاج بھی کیا جاتا ہے۔
