عادل آباد، 5 اگست (تلنگانہ وائس نیوز)
عادل آباد ضلع کے اُٹنور سرکل انسپکٹر مدوی پرساد نے بتایا کہ عوام کو دھمکانے، غنڈہ گردی، دھوکہ دہی اور حملوں جیسے سنگین جرائم میں ملوث ملزم جواڑے گوپال عرف جادَو گوپال (37) ساکن پٹل واڑہ، عادل آباد کے خلاف پریوینٹیو ڈٹینشن (PD) ایکٹ کے تحت کارروائی کرتے ہوئے اسے چرلہ پلی سنٹرل جیل منتقل کر دیا گیا ہے۔
انہوں نے بتایا کہ ملزم کے خلاف اب تک دھمکی، غنڈہ گردی، دھوکہ دہی، لوٹ مار اور حملوں سمیت 16 فوجداری مقدمات درج ہو چکے ہیں۔ متعدد مقدمات درج ہونے کے باوجود وہ مسلسل مجرمانہ سرگرمیوں میں ملوث رہتے ہوئے عوام میں خوف و ہراس پھیلا رہا تھا اور امن و امان کے لیے خطرہ بن گیا تھا۔
سی آئی مدوی پرساد کے مطابق ضلع ایس پی اکھل مہاجن، آئی پی ایس کی سفارش پر ضلع کلکٹر راج رشی شاہ، آئی اے ایس نے ملزم کے خلاف پی ڈی ایکٹ نافذ کرنے کے احکامات جاری کیے، جس کے بعد اسے چرلہ پلی مرکزی جیل منتقل کیا گیا۔
انہوں نے کہا کہ ضلع میں امن و امان کو متاثر کرنے والے اور بار بار جرائم کا ارتکاب کرنے والے افراد کے خلاف آئندہ بھی اسی طرح سخت قانونی کارروائی جاری رہے گی۔ انہوں نے عوام سے اپیل کی کہ دھمکی، دھوکہ دہی، حملوں یا غنڈہ گردی سے متعلق کسی بھی اطلاع یا مشتبہ سرگرمی کی فوری اطلاع قریبی پولیس اسٹیشن کو دے کر پولیس سے تعاون کریں۔
