کانگریس ایس سی شعبہ کے عادل آباد ضلعی سطح کے وسیع اجلاس کی تیاریاں زوروں پر
10 اگست کو ٹی این جی اوز فنکشن ہال میں اجلاس، قائدین و کارکنوں سے بڑی تعداد میں شرکت کی اپیل
ایس سی سیل کے ریاستی وائس چیئرمین درگم شیکھر اور عادل آباد مبصر بی پرشورام نے تیاریوں کا جائزہ لیا
عادل آباد۔8/اگست(تلنگانہ وائس) کانگریس ایس سی شعبہ کے عادل آباد ضلعی سطح کے وسیع اجلاس کی تیاریاں زوروں پر جاری ہیں۔ اجلاس کو کامیاب بنانے کے لیے پارٹی قائدین کی جانب سے بڑے پیمانے پر انتظامات کیے جا رہے ہیں۔ ایس سی سیل کے ریاستی وائس چیئرمین اور عادل آباد سے تعلق رکھنے والے سینئر سیاسی و سماجی رہنما درگم شیکھر نے ضلع کے عوامی نمائندوں، پارٹی قائدین اور کارکنوں سے بڑی تعداد میں اجلاس میں شرکت کرنے کی اپیل کی ہے۔
اسی سلسلہ میں ہفتہ کو ایس سی سیل کے ریاستی وائس چیئرمین اور عادل آباد کے پارٹی مبصر بی پرشورام نے عادل آباد کا دورہ کیا۔ اس موقع پر درگم شیکھر نے ان کا استقبال کیا۔ بعد ازاں دونوں قائدین نے اجلاس کی تیاریوں اور اسے کامیاب بنانے کے لیے کیے جا رہے انتظامات کا جائزہ لیا۔
میڈیا سے بات کرتے ہوئے بی پرشورام نے بتایا کہ تلنگانہ پردیش کانگریس کمیٹی کے ایس سی شعبہ کے زیر اہتمام 10 اگست بروز پیر صبح 11 بجے عادل آباد کے ٹی این جی اوز فنکشن ہال میں ضلعی سطح کا وسیع اجلاس منعقد کیا جائے گا۔
انہوں نے بتایا کہ اجلاس میں ٹی پی سی سی ایس سی شعبہ کے چیئرمین و ایم ایل اے کاوّم پلی ستیہ نارائنا، اے آئی سی سی ایس سی شعبہ تلنگانہ کے انچارج ڈاکٹر سدھارتھ اور عادل آباد پارلیمانی حلقہ کے انچارج سمتا سدرشن بحیثیت مہمانانِ خصوصی شرکت کریں گے۔
Advertising
اجلاس میں گاؤں کی سطح سے کانگریس ایس سی شعبہ کو مزید مضبوط بنانے، دلتوں کی فلاح و بہبود، سماجی انصاف، آئین کے تحفظ، پارٹی کے تنظیمی ڈھانچے کو مستحکم کرنے اور ریاستی حکومت کی فلاحی اسکیموں کو عوام تک پہنچانے سمیت مختلف اہم امور پر تفصیلی تبادلہ خیال کیا جائے گا۔
Advertising
اس موقع پر درگم شیکھر نے کہا کہ ریاستی حکومت کی جانب سے دلتوں کی فلاح و بہبود کے لیے نافذ کی جانے والی اسکیموں سے مستحقین کو واقف کروانے اور انہیں فوائد پہنچانے میں پارٹی قائدین و کارکنوں کو اہم کردار ادا کرنا چاہیے۔ انہوں نے کہا کہ کانگریس پارٹی ڈاکٹر بی آر امبیڈکر کے نظریات اور ان کے خوابوں کی تکمیل کے لیے پابند عہد ہے اور دلتوں کے حقوق کے تحفظ کے لیے مسلسل جدوجہد کر رہی ہے۔
Advertising
درگم شیکھر نے عادل آباد ضلع کے تمام کانگریس قائدین، ایس سی شعبہ کے ضلعی عہدیداران، منڈل صدور، گاؤں کمیٹی کے ارکان، عوامی نمائندوں، نوجوان و خواتین قائدین اور دلت دانشوروں سے اپیل کی کہ وہ 10 اگست کو ہونے والے ضلعی سطح کے وسیع اجلاس میں بڑی تعداد میں شرکت کرتے ہوئے اسے کامیاب بنائیں۔
Advertising
Advertising
Advertising
