ترقی کے ساتھ ذمہ داریاں بھی بڑھتی ہیں: ضلع ایس پی اکھل مہاجن آئی پی ایس
باسرہ زون کے 36 ہیڈ کانسٹیبلز کو اے ایس آئی کے عہدے پر ترقی، عادل آباد ضلع کے 9 اہلکار شامل
ایس پی نے اسٹار لگا کر ترقی پانے والے پولیس اہلکاروں کو مبارکباد دی
فرائض کی انجام دہی میں دیانت داری، نظم و ضبط اور جوابدہی کو ترجیح دینے کی ہدایت
عادل آباد، 8 اگست(تلنگانہ وائس نیوز) باسرہ زون (زون-2) کے تحت ہیڈ کانسٹیبل کے عہدے پر خدمات انجام دینے والے 36 پولیس اہلکاروں کو اسسٹنٹ سب انسپکٹر (اے ایس آئی) کے عہدے پر ترقی دی گئی ہے۔ باسرہ زون کے ڈی آئی جی آر۔ بھاسکرن، آئی پی ایس نے گزشتہ ہفتہ ترقی کے احکامات جاری کیے۔
ترقی پانے والے اہلکاروں میں عادل آباد ضلع سے تعلق رکھنے والے 9 ہیڈ کانسٹیبلز بھی شامل ہیں۔ ان میں عطاء اللہ خان، بی۔ تلسی رام، پی۔ آدی لکشمی، ایم۔ رادھا، کے۔ جئے شری، ایم۔ کوٹیشور راؤ، ایم۔ گووند، ڈی۔ رمیش اور جئے کرسٹو شامل ہیں، جنہیں اے ایس آئی کے عہدے پر ترقی دی گئی۔
اس موقع پر ضلع ایس پی اکھل مہاجن، آئی پی ایس نے ترقی پانے والے پولیس اہلکاروں کو ضلع پولیس ہیڈکوارٹرز مدعو کرکے مبارکباد پیش کی۔ ایس پی نے ان کے کندھوں پر ترقی کی علامت اسٹار سجا کر نیک خواہشات کا اظہار کیا۔
اس موقع پر ایس پی اکھل مہاجن نے کہا کہ ترقی محض عہدے میں اضافہ نہیں بلکہ ذمہ داریوں میں بھی اضافے کا نام ہے۔ انہوں نے ترقی پانے والے افسران کو ہدایت دی کہ وہ نئے عہدے کی ذمہ داریوں کو مزید جوش، جذبے اور فرض شناسی کے ساتھ انجام دیں۔
Advertising
انہوں نے کہا کہ پولیس فرائض کی انجام دہی میں اصول پسندی، دیانت داری، نظم و ضبط، وقت کی پابندی اور جوابدہی کو ہمیشہ مقدم رکھا جائے۔ عوام کے ساتھ ذمہ دارانہ رویہ اختیار کرتے ہوئے انہیں بہتر پولیس خدمات فراہم کی جائیں اور پولیس محکمہ کی نیک نامی میں مزید اضافہ کرنے کے لیے کام کیا جائے۔
Advertising
ایس پی نے امید ظاہر کی کہ ترقی پانے والے تمام اے ایس آئی اپنے نئے فرائض کو مؤثر انداز میں انجام دیتے ہوئے محکمہ پولیس کا نام روشن کریں گے۔
Advertising
اس پروگرام میں سی سی کونڈا راجو، پولیس ایسوسی ایشن کے صدر پنچالا وینکٹیشورلو، جیسوال کویتا اور دیگر پولیس ملازمین نے شرکت کی۔
Advertising
