گنیش وسرجن کے دوران پولیس کے فرائض میں خلل ڈالنے والوں کے خلاف مقدمات
شراب نوشی کرکے امن عامہ میں خلل ڈالنے والوں پر کارروائی، بجلی کے کیبل و تار کاٹنے والے کونسلر گنٹا جیون کے خلاف بھی کیس درج
عادل آباد، 23 /ستمبر (تلنگانہ وائس)
گنیش نَو راتری کے وسرجن پروگرام کو پرامن انداز میں انجام دینے کے لیے پولیس کی جانب سے سخت حفاظتی انتظامات کیے گئے تھے۔ اس دوران پولیس کے فرائض میں خلل ڈالنے، شراب نوشی کرکے امن عامہ میں خلل پیدا کرنے اور نامناسب رویہ اختیار کرنے والے تین افراد کے خلاف عادل آباد ٹو ٹاؤن پولیس اسٹیشن میں مقدمات درج کیے گئے ہیں۔ یہ اطلاع ٹو ٹاؤن انسپکٹر کے. ناگراجو نے دی۔
انسپکٹر کے مطابق بھاگیہ نگر سے تعلق رکھنے والے کونسلر گنٹا جیون نے گنیش وسرجن کے موقع پر بندوبست میں مصروف پولیس اہلکاروں کے فرائض میں رکاوٹ پیدا کی۔ شراب کے نشے میں نامناسب رویہ اختیار کرنے کے علاوہ بجلی کے تار اور کیبل کاٹ کر نقصان پہنچانے کی کوشش کرنے کا بھی الزام ہے۔ اس سلسلے میں مقدمہ درج کرتے ہوئے قانونی کارروائی شروع کردی گئی ہے۔
Advertising
اسی طرح مہالکشمی واڑہ سے تعلق رکھنے والے بٹّوار رام کرشنا کے خلاف بھی شراب نوشی کرکے گنیش وسرجن پروگرام میں خلل ڈالنے، پولیس اہلکاروں کے فرائض میں رکاوٹ پیدا کرنے اور امن عامہ متاثر کرنے کے الزام میں مقدمہ درج کیا گیا ہے۔
Advertising
کرانتی نگر سے تعلق رکھنے والے ارون کے خلاف بھی شراب نوشی کرکے گنیش نَو راتری کے وسرجن پروگرام کے دوران جھگڑے کی صورتحال پیدا کرنے کے الزام میں مقدمہ درج کیا گیا ہے۔
Advertising
ٹو ٹاؤن انسپکٹر کے. ناگراجو نے عوام سے اپیل کی کہ گنیش وسرجن پروگرام پرامن اور عقیدت و احترام کے ساتھ منعقد کرنے کے لیے پولیس سے تعاون کریں۔ انہوں نے واضح کیا کہ بندوبست میں مصروف پولیس اہلکاروں کے فرائض میں رکاوٹ ڈالنے، شراب نوشی کرکے عوام کو مشکلات میں مبتلا کرنے یا امن و امان میں خلل پیدا کرنے والی سرگرمیوں میں ملوث افراد کے خلاف قانون کے مطابق سخت کارروائی کی جائے گی۔
