اے آئی کے ذریعے اسلحہ بردار تصویر سوشل میڈیا پر پوسٹ کرنے والا راؤڈی شیٹر گرفتار
عادل آباد20/جون(تلنگانہ وائس)عادل آباد رورل پولیس نے مصنوعی ذہانت (AI) کا استعمال کرتے ہوئے خود کو بندوق تھامے ہوئے ظاہر کرنے والی تصویر سوشل میڈیا پر پوسٹ کرنے کے الزام میں ایک راؤڈی شیٹر کو گرفتار کر لیا ہے۔ اس سلسلے میں عادل آباد رورل پولیس اسٹیشن میں مقدمہ درج کرکے تحقیقات شروع کر دی گئی ہیں۔
رورل سرکل انسپکٹر رحیم پاشا نے بتایا کہ چچ دھاری (خانہ پور) کے رہائشی گائیکوامبلے دلت نے اے آئی ٹیکنالوجی کے ذریعے بندوق کے ساتھ اپنی تصویر تیار کرکے سوشل میڈیا پر پوسٹ کی، جس سے عوام میں خوف و ہراس پیدا ہونے کا اندیشہ تھا۔ پولیس کو اس پوسٹ کی اطلاع ملنے کے بعد تحقیقات کا آغاز کیا گیا اور ملزم کو حراست میں لے کر قانونی کارروائی عمل میں لائی گئی۔
سی آئی رحیم پاشا نے واضح کیا کہ سوشل میڈیا پر بندوقوں، چاقوؤں یا دیگر مہلک ہتھیاروں کے ساتھ تصاویر اور ویڈیوز پوسٹ کرنا، عوام کو خوفزدہ کرنا اور نوجوانوں کو گمراہ کرنا قانوناً جرم ہے۔ انہوں نے خبردار کیا کہ راؤڈی ازم کو فروغ دینے والی پوسٹس، ریلز اور ویڈیوز بنانے یا شیئر کرنے والوں کے خلاف سخت کارروائی کی جائے گی۔
انہوں نے مزید کہا کہ سالگرہ، تقریبات یا دیگر پروگراموں کے نام پر ہتھیاروں کی نمائش کرنا، ان کی تشہیر سوشل میڈیا پر کرنا یا عوامی مقامات پر امن و امان میں خلل ڈالنے والی سرگرمیوں میں ملوث افراد کے خلاف بھی قانون کے مطابق مقدمات درج کیے جائیں گے۔
پولیس نے عوام سے اپیل کی ہے کہ سوشل میڈیا کا ذمہ داری کے ساتھ استعمال کریں اور اگر کسی غیر قانونی یا اشتعال انگیز پوسٹ کی اطلاع ہو تو فوری طور پر پولیس کو مطلع کریں۔
