بی جے پی کونسلروں کی ہنگامہ آرائی شرمناک . چیئرپرسن اُما رانی سرینواس
Telangana Voice News
کاماریڈی، 24/ جولائی (سیدکوثرعلی کی رپورٹ)
کاماریڈی میونسپل کونسل کی چیئرپرسن اِپّا اُما رانی سرینواس نے الزام عائد کیا کہ بھارتیہ جنتا پارٹی (بی جے پی) کے کونسلر شہر کی ترقی میں رکاوٹیں پیدا کرنے کے مقصد سے جنرل باڈی اجلاس میں ہنگامہ آرائی پر اتر آئے۔ انہوں نے کہا کہ ایک خاتون چیئرپرسن کا احترام کیے بغیر پوڈیم پر چڑھ جانا، ایجنڈے کی نقول پھاڑ دینا اور مائیک پھینکنا بی جے پی کونسلروں کے غیر جمہوری رویے کی عکاسی کرتا ہے۔
جمعرات کو میونسپل دفتر میں منعقدہ پریس کانفرنس سے خطاب کرتے ہوئے چیئرپرسن نے کہا کہ شہر کے تمام 49 وارڈوں کی یکساں ترقی کو مدنظر رکھتے ہوئے 35 عوامی مفاد کے نکات پر مشتمل ایجنڈا تیار کیا گیا تھا، لیکن اجلاس شروع ہونے سے پہلے ہی بی جے پی کونسلروں نے شور شرابہ کرتے ہوئے ایجنڈے کی نقول پھاڑ دیں اور اجلاس میں خلل ڈالا۔
Advertising
انہوں نے کہا کہ عوامی خدمت کے دعوے کرنے والی بی جے پی ہر اجلاس کو جان بوجھ کر تنازع کا شکار بنا کر ترقیاتی کاموں میں رکاوٹ ڈال رہی ہے۔ ان کا کہنا تھا کہ کانگریس کی میونسپل قیادت ہر قسم کی رکاوٹوں کے باوجود کاماریڈی شہر کی ترقی اور عوامی فلاح کے لیے اپنی کوششیں جاری رکھے گی۔
Advertising
چیئرپرسن اُما رانی سرینواس نے بی جے پی کونسلروں سے اپیل کی کہ وہ ہنگامہ آرائی کی سیاست ترک کرتے ہوئے آئندہ اجلاسوں میں شہر کی ترقی کے لیے تعاون کریں۔
Advertising
اس موقع پر میونسپل کونسلروں اور شریک اراکین میں شیرو، مہیش، موتی لال، ببلو، جاوید، تحسین النساء، گنگا دھر، ونیتا، للیتا، ساوتری، لاونیا، سلطانہ، سلطانہ بیگم، امجد، فاطمہ، عقیلہ، ناگامنی، واجد، راجمنی، سلطانہ انور، سنیتا، علی بن عبداللہ، اسما اور دیگر موجود تھے.
Advertising
