عوام کو بہتر پولیسنگ کی فراہمی اولین ترجیح، جرائم کی پیشگی روک تھام اور سوشل میڈیا پر کڑی نگرانی کی ہدایت ۔ ڈی آئی جی آر بھاسکرن
عادل آباد کے دورے پر ضلعی پولیس افسران کے ساتھ جائزہ اجلاس، بین الریاستی سرحد پر منشیات و غیر قانونی سرگرمیوں کے خلاف سخت نگرانی جاری رکھنے پر زور
عادل آباد، 11/ جولائی(تلنگانہ وائس)
باسر زون کے ڈپٹی انسپکٹر جنرل آف پولیس (ڈی آئی جی) آر بھاسکرن، آئی پی ایس نے کہا ہے کہ عوام کو معیاری اور مؤثر پولیسنگ فراہم کرنا ہر پولیس افسر کی بنیادی ذمہ داری ہے۔ انہوں نے ہدایت دی کہ اطلاعاتی نظام کو مزید مضبوط بنا کر جرائم کی پیشگی روک تھام کو یقینی بنایا جائے، جبکہ بیسک، ویزیبل اور پروایکٹو پولیسنگ کو مؤثر انداز میں نافذ کیا جائے۔
ہفتہ کے روز عادل آباد کے دورے کے موقع پر پولیس اے آر ہیڈ کوارٹر میں منعقدہ جائزہ اجلاس میں ضلع ایس پی اکھل مہاجن، آئی پی ایس نے ڈی آئی جی کا استقبال کیا اور ضلع میں امن و امان، جرائم پر قابو پانے کے اقدامات، خصوصی مہمات اور پولیس اسٹیشنوں کی کارکردگی سے متعلق تفصیلی بریفنگ دی۔
ڈی آئی جی نے ضلع کی پولیس کارکردگی کو سراہتے ہوئے ہر ایس ایچ او سے انفرادی طور پر گفتگو کی اور کہا کہ عوام میں احساسِ تحفظ پیدا کرنے کے لیے فیلڈ پولیسنگ کو مزید مؤثر بنایا جائے۔ انہوں نے سوشل میڈیا پر مسلسل نگرانی رکھتے ہوئے نفرت انگیز پوسٹس، جھوٹی افواہوں اور مذہبی منافرت پھیلانے والی سرگرمیوں کے خلاف فوری کارروائی کی ہدایت دی۔
Advertisment
انہوں نے کہا کہ عادل آباد بین الریاستی سرحدی ضلع ہونے کے باعث گانجہ، منشیات، اسمگلنگ اور دیگر غیر قانونی سرگرمیوں پر خصوصی نظر رکھی جائے۔ سائنسی اور تکنیکی شواہد کی بنیاد پر معیاری تحقیقات کرتے ہوئے ملزمان کو عدالتوں سے سزا دلانے کے لیے مضبوط چارج شیٹس تیار کی جائیں۔
ڈی آئی جی نے تمام پولیس اسٹیشنوں میں 5S نظام نافذ کرنے، صفائی، شفافیت اور نظم و ضبط کو فروغ دینے پر بھی زور دیا۔ اجلاس کے بعد ڈی آئی جی آر بھاسکرن اور ضلع ایس پی اکھل مہاجن نے پولیس گیسٹ ہاؤس کے احاطے میں شجرکاری بھی کی۔
اجلاس میں ایڈیشنل ایس پی پی مونیکا، آئی پی ایس، اوٹنور اے ایس پی رتھوک سائی کوٹے، آئی پی ایس، مختلف ڈی ایس پیز، سی آئیز، ایس آئیز اور پولیس کے دیگر اعلیٰ افسران و عملہ شریک تھا۔
