تلنگانہ وائس
عادل آباد کے جگجیون چوک پر غیر قانونی فلیکسیاں نصب کرنے والے چار افراد کے خلاف مقدمہ درج
ٹریفک میں رکاوٹ اور عوامی سلامتی کو خطرے میں ڈالنے والوں کے خلاف سخت کارروائی کی جائے گی ۔ ون ٹاؤن انسپکٹر بی سنیل کمار
عادل آباد، 6/ جولائی(تلنگانہ وائس) عوامی سلامتی کے پیش نظر پولیس اور میونسپل محکمہ کی جانب سے جاری کردہ ضوابط کی خلاف ورزی کرتے ہوئے عادل آباد کے جگجیون چوک پر بغیر اجازت فلیکسیاں نصب کرنے والے چار افراد کے خلاف مقدمہ درج کیا گیا ہے۔ یہ اطلاع ون ٹاؤن انسپکٹر بی سنیل کمار نے دی۔
انہوں نے بتایا کہ روہت شِنڈے، مہانکالی اجئے، یانم نرسنگ راؤ اور فرنگی ملیش کے خلاف مقدمہ درج کیا گیا ہے۔ اس کے علاوہ مذکورہ فلیکسیاں تیار کرنے اور نصب کرنے والے واسوی فلیکسی، سنیل فلیکسی اور ایس آر ڈی فلیکسی کے ذمہ داران کے خلاف بھی قانونی کارروائی کرتے ہوئے کیس درج کیا گیا ہے۔
انسپکٹر بی سنیل کمار نے کہا کہ مصروف چوراہوں پر غیر قانونی فلیکسیاں نصب کرنے سے سڑک کی حدِ نگاہ متاثر ہوتی ہے، ٹریفک سگنلز واضح طور پر نظر نہیں آتے اور حادثات کا خطرہ بڑھ جاتا ہے۔ انہوں نے خبردار کیا کہ عوام کی جان و مال کو خطرے میں ڈالنے والی ایسی سرگرمیوں کو ہرگز برداشت نہیں کیا جائے گا اور آئندہ بھی ضوابط کی خلاف ورزی کرنے والوں کے خلاف سخت قانونی کارروائی جاری رہے گی۔
