یونانی طبی خدمات کو عوام تک مؤثر انداز میں پہنچایا جائے ۔ وزیر صحت دامودر راجنرسمہا
حیدرآباد۔14/جولائی(تلنگانہ وائس)ریاستی وزیر صحت دامودر راجنرسمہا نے متعلقہ حکام کو ہدایت دی ہے کہ یونانی طبی خدمات کو عوام کے لیے مزید آسان اور قابلِ رسائی بنایا جائے اور معیاری طبی سہولیات کی فراہمی کو یقینی بنایا جائے۔
پیر کے روز سکریٹریٹ میں منعقدہ جائزہ اجلاس میں وزیر صحت نے محکمہ آیوش کی کارکردگی، نظامیہ طبی اسپتال میں فراہم کی جانے والی طبی خدمات، بنیادی ڈھانچے، جاری تعمیراتی کاموں اور آئندہ منصوبوں کا تفصیلی جائزہ لیا۔ انہوں نے کہا کہ گورنمنٹ نظامیہ طبی کالج اور نظامیہ جنرل اسپتال ریاست میں یونانی طب کے باوقار ادارے ہیں اور حکومت ان کی ترقی کو اولین ترجیح دے رہی ہے۔
وزیر نے ٹی جی ایم ایس آئی ڈی سی کے چیف انجینئر کو اسپتال میں زیرِ تعمیر او پی بلاک اور فارمیسی عمارت کے کاموں کو تیز کرنے کی ہدایت دیتے ہوئے کہا کہ یہ منصوبے آئندہ جنوری تک مکمل کرکے عوام کے لیے دستیاب کیے جائیں۔
اشتہار
انہوں نے محکمہ صحت کے پرنسپل سکریٹری کو ڈاکٹروں، تدریسی عملے اور دیگر ملازمین کی خالی آسامیوں کو فوری طور پر پُر کرنے کے لیے تجاویز حکومت کو روانہ کرنے کی ہدایت دی تاکہ طبی خدمات اور تعلیمی سرگرمیاں متاثر نہ ہوں۔
وزیر صحت نے یہ بھی ہدایت دی کہ تمام یونانی ڈسپنسریوں اور اسپتالوں میں ضروری ادویات، طبی آلات اور بنیادی سہولیات کی مکمل دستیابی کو یقینی بنایا جائے۔
اس موقع پر ڈائریکٹر آیوش سریکانت بابو نے بتایا کہ گزشتہ سال حکومت کی جانب سے آیوش میں 138 اسسٹنٹ پروفیسرس کی تقرری کے بعد ڈاکٹروں کی کمی کافی حد تک دور ہو گئی ہے۔ انہوں نے مزید بتایا کہ نظامیہ طبی کالج، نظامیہ جنرل اسپتال اور دیگر عمارتوں کی تزئین و مرمت اور نئی عمارتوں کی تعمیر کے لیے 52.50 کروڑ روپے منظور کیے گئے ہیں، جن پر کام جاری ہے، جبکہ ضروری یونانی ادویات کی خریداری اور تقسیم بھی مسلسل کی جا رہی ہے۔
اجلاس میں ریاستی سطح پر یونانی ادویات تیار کرنے کے لیے مجوزہ دوا سازی یونٹ کے منصوبے کو جلد عملی شکل دینے پر بھی زور دیا گیا۔ مولالی میں واقع سرکاری یونانی ڈسپنسری کی عمارت سے متعلق مسائل کا جائزہ لیتے ہوئے وزیر نے ہدایت دی کہ وہاں طبی خدمات میں کسی قسم کی رکاوٹ نہ آنے دی جائے۔
اجلاس میں چارمینار کے رکن اسمبلی میر ذوالفقار علی، محکمہ صحت کی پرنسپل سکریٹری ڈاکٹر کرسٹینا زیڈ چونگتو، ڈائریکٹر آیوش سریکانت بابو، سپرنٹنڈنٹ نظامیہ طبی اسپتال اور دیگر اعلیٰ حکام شریک تھے۔
#وزیر_صحت
#دامودر_راجنرسمہا
#یونانی_طب
#یونانی_علاج
#آیوش
#نظامیہ_طبی_کالج
#نظامیہ_جنرل_اسپتال
#حیدرآباد
#صحت_عامہ
#طبی_خدمات
#صحت_کی_سہولیات
#عوامی_فلاح
#سرکاری_اسپتال
#تلنگانہ
#تلنگانہ_حکومت
#اردو_نیوز
#تلنگانہ_وائس
