عادل آباد ایئرپورٹ اور ڈی آر ڈی او پروجیکٹ کے لیے مرکزی تعاون کی درخواست
وزیر اعلیٰ ریونت ریڈی کی دہلی میں مرکزی وزیر دفاع راج ناتھ سنگھ سے ملاقات
نئی دہلی/حیدرآباد، 23 /جون(تلنگانہ وائس)وزیر اعلیٰ تلنگانہ اے ریونت ریڈی نے پیر کے روز نئی دہلی میں مرکزی وزیر دفاع راج ناتھ سنگھ سے ملاقات کرتے ہوئے عادل آباد ایئرپورٹ کی توسیع اور ڈی آر ڈی او سے متعلق اہم منصوبوں پر تفصیلی تبادلۂ خیال کیا۔ اس موقع پر وزیر اعلیٰ نے عادل آباد کے مجوزہ گاندھی سروور پروجیکٹ کے لیے دفاعی محکمہ کی جانب سے اراضی کی فراہمی پر مرکزی حکومت کا شکریہ ادا کیا۔
ریونت ریڈی نے وزیر دفاع کو بتایا کہ عادل آباد ایئرپورٹ کی ترقی اور توسیع کے لیے ریاستی حکومت زمین کے حصول، بنیادی سہولتوں کی منتقلی اور دیگر ضروری امور میں مکمل تعاون فراہم کرے گی تاکہ اس منصوبے کو جلد از جلد عملی شکل دی جا سکے۔
وزیر اعلیٰ نے محبوب نگر ضلع کے دیورکدرہ کے قریب ڈی آر ڈی او/ڈی آر ڈی ایل کی جانب سے منتخب کردہ اہم پروجیکٹ کی فوری منظوری کی بھی درخواست کی۔ انہوں نے کہا کہ اس منصوبے سے ریاست میں دفاعی تحقیق، صنعتی ترقی اور روزگار کے نئے مواقع پیدا ہوں گے۔
ملاقات کے دوران دونوں قائدین نے ریاست میں دفاعی شعبہ سے متعلق ترقیاتی امکانات اور مرکزی و ریاستی حکومتوں کے باہمی تعاون پر بھی تبادلۂ خیال کیا۔ وزیر اعلیٰ نے امید ظاہر کی کہ مرکز تلنگانہ کے اہم ترقیاتی منصوبوں کو جلد منظوری فراہم کرے گا، جس سے ریاست کی معاشی اور صنعتی ترقی کو مزید فروغ ملے گا۔
— تلنگانہ وائس نیوز ڈیسک
