رِمس اور سوپر اسپیشالٹی اسپتال کے کنٹراکٹ ملازمین کو ہراساں کرنا بند کیا جائے، ورنہ سخت احتجاج ہوگا: سرّا دیویندر
عادل آباد، یکم جولائی (تلنگانہ وائس) آل انڈیا ٹریڈ یونین کانگریس (AITUC) تلنگانہ میڈیکل کنٹراکٹ ورکرس یونین کی جانب سے بدھ کے روز ضلع کلکٹریٹ کے سامنے رِمس اور سوپر اسپیشالٹی اسپتال کے کنٹراکٹ ملازمین کے مسائل کے حل کے مطالبہ پر احتجاجی دھرنا دیا گیا۔ اس احتجاج کی قیادت ضلع صدر نلّا شیونا اور ضلع جنرل سکریٹری ڈونگرے چندو نے کی۔
اس موقع پر یونین کے ریاستی نائب صدر اور اے آئی ٹی یو سی ضلع جنرل سکریٹری سرّا دیویندر نے بطور مہمانِ خصوصی شرکت کرتے ہوئے میڈیا سے خطاب کیا۔ انہوں نے کہا کہ رِمس اور سوپر اسپیشالٹی اسپتال میں خدمات انجام دینے والے صفائی، پیشنٹ کیئر اور سکیورٹی گارڈس کے ملازمین کو شدید مشکلات کا سامنا ہے۔
انہوں نے بتایا کہ سابق کنٹراکٹ کمپنی کرشنا کنسٹرکشن ہر ماہ دس تاریخ تک ملازمین کی تنخواہیں ادا کرتی تھی، جبکہ پندرہ تاریخ سے قبل پی ایف اور ای ایس آئی کی رقم بھی ملازمین کے کھاتوں میں جمع کرائی جاتی تھی۔ اس کے علاوہ ہر سال دو جوڑی یونیفارم فراہم کیے جاتے تھے اور صفائی ملازمین کو پیشنٹ کیئر کے عہدوں پر ترقی بھی دی جاتی تھی۔
سرّا دیویندر نے الزام عائد کیا کہ کرشنا کنسٹرکشن کو ہٹائے جانے کے تقریباً ڈیڑھ سال بعد بھی نیا کنٹراکٹ مقرر نہیں کیا گیا، جبکہ رِمز کے ڈائریکٹر خود کنٹراکٹ کی نگرانی کر رہے ہیں، جس کے باعث ملازمین کو متعدد مسائل کا سامنا ہے۔ انہوں نے مطالبہ کیا کہ دو ماہ کی بقایا تنخواہیں، چار ماہ کی پی ایف و ای ایس آئی رقم، یونیفارم کی فراہمی اور صفائی ملازمین کو پیشنٹ کیئر کے عہدوں پر ترقی فوری طور پر دی جائے۔
انہوں نے خبردار کیا کہ اگر ملازمین کے مطالبات فوری طور پر پورے نہ کیے گئے تو اے آئی ٹی یو سی کی قیادت میں تمام ملازمین کو متحد کرتے ہوئے بڑے پیمانے پر احتجاجی تحریک شروع کی جائے گی، جس کی تمام تر ذمہ داری متعلقہ انتظامیہ پر عائد ہوگی۔
بعد ازاں یونین قائدین اور کارکنوں نے اپنے مطالبات پر مشتمل ایک یادداشت ضلع کلکٹر راج رشی شاہ کو پیش کرتے ہوئے رِمز اسپتال کے معاملات میں خصوصی مداخلت کر کے کنٹراکٹ ملازمین کو انصاف فراہم کرنے کی اپیل کی۔
اس احتجاجی پروگرام میں یونین کے ضلع ورکنگ صدر ایم ڈی مجیب، معاون سکریٹری نیتیادی ناگیش، نائب صدور ایم ڈی عرفان، پیندور دلیپ، وینکٹیش، کملمّا، رِمز برانچ صدر جی سنگیتا، جنرل سکریٹری ایم ڈی قاسم، ضلع قائدین ایس کے اقبال، عامر، ڈی لکشمی، سرجا بھائی سمیت بڑی تعداد میں کنٹراکٹ ملازمین نے شرکت کی۔
