پوجا کے نام پر خوفزدہ کرکے رقم وصول کرنے والا جعلی بابا اور اس کی بیوی گرفتار
کالا جادو ختم کرنے کے نام پر خاندان کے فرد کی موت کا خوف پیدا کرکے ₹81,600 وصول کئے، مزید ₹1.32 لاکھ کا مطالبہ؛ متاثرہ شخص کی شکایت پر موالا پولیس کی کارروائی
عادل آباد، 15 ستمبر(تلنگانہ وائس) عادل آباد کے موالا پولیس اسٹیشن حدود میں واقع بنجارہ ہلز کالونی میں پوجا پاٹ کے ذریعے خاندانی مسائل حل کرنے کا جھانسہ دے کر اور کالا جادو ختم نہ ہونے کی صورت میں خاندان کے ایک فرد کی موت واقع ہونے کا خوف پیدا کرکے رقم وصول کرنے والے میاں بیوی کو پولیس نے گرفتار کرلیا۔
اس سلسلہ میں عادل آباد ڈی ایس پی ایل۔ جیون ریڈی نے موالا پولیس اسٹیشن میں منعقدہ پریس کانفرنس میں تفصیلات بتائیں۔ انہوں نے بتایا کہ ملزم سلیم سید عرف سلیم بشیر سید نے متاثرہ شخص کو یقین دلایا کہ وہ پوجا پاٹ اور عملیات کے ذریعے اس کے خاندانی مسائل حل کرسکتا ہے۔ ملزم نے متاثرہ شخص کے مکان پر پوجا پاٹ بھی کی۔
Advertising
بعد ازاں ملزم نے متاثرہ شخص کو سونا اور چاندی خریدنے پر مجبور کیا اور مزید پوجا کا سامان درکار ہونے کا کہہ کر اسے مہاراشٹرا کے ایوت محل لے گیا۔ وہاں بھسم اور دیگر پوجا کے سامان کے نام پر متاثرہ شخص سے 81 ہزار 600 روپے وصول کیے گئے۔
Advertising
بعد میں مزید ایک لاکھ 32 ہزار روپے کی ضرورت بتاتے ہوئے متاثرہ شخص کو دھمکایا گیا کہ اگر پوجا مکمل نہ کی گئی تو اس کے خاندان کے ایک فرد کی جان کو خطرہ لاحق ہوجائے گا۔ ملزمان کی باتوں پر شبہ ہونے کے بعد متاثرہ شخص نے پولیس سے رجوع کیا۔
شکایت موصول ہونے پر موالا پولیس نے مقدمہ درج کرکے تحقیقات شروع کی اور دونوں ملزمان کو گرفتار کرلیا۔ پولیس کے مطابق گرفتار ملزمان کی عمریں بالترتیب 40 اور 46 سال ہیں اور دونوں کا تعلق پیڈباگ گاؤں، وڈوا تعلقہ، ضلع سانگلی، مہاراشٹرا سے بتایا گیا ہے۔
Advertising
ڈی ایس پی ایل۔ جیون ریڈی نے عوام سے اپیل کی کہ توہمات اور اندھی عقیدت کا سہارا لے کر خوفزدہ کرتے ہوئے رقم وصول کرنے والے افراد سے محتاط رہیں۔ انہوں نے کہا کہ اس نوعیت کی کسی بھی مشتبہ سرگرمی یا واقعہ کی اطلاع فوری طور پر پولیس کو دی جائے۔
اس موقع پر موالا سرکل انسپکٹر بی۔ ڈی۔ پریم کمار اور پولیس عملہ موجود تھا۔
